 |
 |
 |
  |
|
|
|
|
 |
|
|
Commodore Josaia Voreqe Bainimarama, Prime Minister Tavoci ni Tabana ni Vola ni Sucu E na Vei Positovesi Korovou Post Office Wed. 3rd September, 2008 TAILEVU Ni sa tiko na Turaga na Vunilawa ka Minisita talega e qarava na bisinisi ni Matanitu; Ni tiko na Turaga na Chairman ni Board ni Post Fiji; Ni tiko na Turaga na Ratu e Waimaro Levulevu; Ni tiko na Turaga ni Vanua Vakaturaga o Verata, Sawakasa, Dawasamu kei Wainibuka; Ni tiko na Turaga kei na Marama veiqaravi ena Matanitu ena tikotiko oqo e Korovou; Ni tiko na Turaga na Marama kei kemuni na luveda. Au vakavinavinaka e na veisureti meu mai tiko e na i tikotiko ni Mata Timi Qaqa na Northland Tarumba, meu mai tavoca e dua na i sausau vou ni cakacaka ni nomuni Matanitu tu Vakawawa e na kena vakataucokotaki ka vakavinakataki na ivakatagedegede ni veiqaravi ni Tabacakacaka ni Matanitu vei kemuni na lewe ni noda vanua. Au marau talega ni rawa ni mai qaravi na i tavi oqo e na tikotiko vakaturaga i Namalata. Na neitou digitaki Korovou e na cakacaka oqo e vakaraitaki ni nona gagadre na Matanitu tu Vakawawa me vakaqara na nona veivakatoroicaketaki kina veivanua eso ka laurai ni lutu koto mai ena veimatanitu sa oti. Au gadreva kina meu vakaraitaka na noqu vakavinavinaka titobu vei ira na lewe ni vanua e Korovou e na nomuni ciqomi keimami e na vakarau ni veiqaravi e da dau kilai tani kina. Au nanuma ni sega tale ni dua na taba ni veiqaravi vakamatanitu e tetevi keda vakararaba kece na lewe i Viti na kena veiqaravi me vaka na Tabacakacaka e qarava na kena volai na i Vola ni Sucu, na i Vola ni Mate kei na Vakamau se na Registrar General’s Office. E na noda i tutu vakatamata, e da okati me da volai e na dua na matanitu ka vakatakilakilataki ni da vu mai kina se da lewe ni kena vanua. E bibi kina na kena taqomaki ka maroroi vinaka na keda i vola tukutuku yadua ka me vakarawarawataki talega na kena tabaki vei keda na i vola vakadinadina ni noda sucu. E na veigauna taumada e a dau nona i tavi voli ga na Registrar General’s Office me maroroya ka tabaka duadua na i vola vakadinadina oqo. E a tauyavu na veiqaravi oqo mai Suva ni bera ni tete yani na veiqaravi me yaco ki Labasa kei na Yasayasa vaka Ra mai Lautoka. E a vakatetei na veiqaravi me rawa ni vakataucokotaki kina na veiqaravi ena vukumuni na lewe ni vanua. Ia e mai seva baleta ni sa tubu cake tikoga na keda i wiliwili ka sega ni veiriti rawa na levu ni valenivolavola oqo kei na gagadre ni lewe ni vanua me baleta na taba ni i Vola ni Sucu. E a mai vakawaleni tale tu ga vakadede na valenivolavola oqo ka dredre kina me toroi cake vakatotolo na i vakatagedegede ni nona veiqaravi. Ia ena sasaga ka na mai tavo nikua, esa na kauta cake tale kina dua na i vakatagedegede ni veiqaravi ni nomuni Matanitu me sa na sega walega ni rawa vei kemuni mo ni rawata ni qai lako i Suva, Lautoka se Labasa mo ni laki taura mai kina na nomuni i vola vakadinadina ni sucu. Sa na tekivu e Korovou kei Nausori na veiqaravi oqo ni bera ni tete yani ki Savusavu, Rotuma, Levuka vata kei Nasinu ena loma ni vica na macawa sa tu qo e matada. E na veigauna sa oti e dau ka e lulevaki voli na kena berabera na veiqaravi ena Valenivolavola ni Sucu, ena kena sa dau balavu na i yatu ni wawa me caka na veiqaravi, e na kena sa rui sau levu na i vodovodo ni lako ki Suva se ki Lautoka se Labasa. Ia ni oti na siga nikua e sa dodonu me sa uasivi cake sara na i vakatagedegede ni veiqaravi oqo ni sa na rawa vei kemuni mo ni lako ga kina dua na Post Office e tu kina na internet connections mo ni laki rawata mai kina na nomuni Vola ni Sucu. Au ciqoma tale tikoga ni sa yaco tiko na veivosaki me sa na rawa talega vei kemuni na noda lewe ni vanua mo ni na rawa ni rawata talega na i Vola ni Vakamau kei na i Vola Vakadinadina ni Mate mai na vei Post Office. Au nuitaka vakalevu cake ni sa na rawa talega e na loma ni dua na gauna mai oqo mo ni sa na rawa ni register taka e dua na gone sucu vou ena noda vei Post Office. E na veitaba ni bisinisi ni Matanitu e sega tale ni dua na tabana ni cakacaka e veiqaravi cake vakalevu e na noda veikoro vakavavalagi me vaka na Post Fiji. Au vakavinavinaka e na vakasama ni rawa ni vakaitavitaki koya tale na Post Fiji e na sasaga oqo me vakavolekataka mai na veiqaravi ni Matanitu vei kemuni na noda e na taudaku ni noda vei koro lelevu. Au vakanuinui ni na rawa ni dau veiqaravi tiko ga na kabani e na veisasaga vata vakaoqo e na veigauna mai muri. Au gadreva ga meu vakavinavinaka vei ira na vakaitavi e na sasaga ni kena rawa mai vei keda na veiqaravi oqo. Vakabibi ena Tabacakacaka ni Lawa kei na i Vola ni Sucu kei na tabana ni Post Fiji e Viti kei na Tabacakacaka ni ITC ni noda Matanitu. Au vakavinavinaka vakalevu vei kemuni na wekada ni yaco rawa mai e na siga nikua e na veidelani yavu Vakaturaga e na vualiku kei Tailevu kei na kena veimata tamata kece sara e da tiko rawa e na siga nikua. Au via mai tinia ga e na vakanananu niu via vakadeitaka tiko vei kemuni na lewe ni noda vanua na i naki ni Matanitu me vakaqaqacotaka na nona veiqaravi vei kemuni ka na dau segata e na veigauna me vakavinakataka tikoga na i vakatagedegede ni nona veiqaravi me rawa kina na tiko sautu kei na kalougata vei keda. Vinaka vakalevu ___________________ |
|
|
 |
     |
