COMMODORE JOSAIA VOREQE BAINIMARAMA, CF(Mil), OStJ, MSD, jssc, psc

Prime Minister and Minister for Finance, Strategic Planning, National Development and Statistics, Public Service, Peoples Charter for Change and Progress, Information, iTaukei Affairs, Provincial Development, Sugar Industry, and Lands and Mineral Resources

__________________________________________________


VOSA E NA DOLA NI BURETU WOMEN’S RESOURCE CENTRE


Buretu Village Wed. 14th Nov., 2012

TAILEVU 1000 Hours
___________________________________________________

Veikidavaki

Ni sa tiko na:

Turaga kei na Marama ni vanua vakaturaga ko Buretu;
Kemuni na vulagi ni tiko rawa e na siga edai;
Veisoqosoqo Vakamarama ni maliwai keimami tiko e daidai;
Kemuni na Vakailesilesi Vakamatanitu kei kemuni na lalai.

E ka dokai dina vei au e na mataka edai meu mai vakaitavi e na kena vakavatukanataki e dua na nomuni sasaga yaga na noda Marama.

Oqo e na kena mai dola na nomuni Vale, ka sa dua na cavu i kalawa ki liu e na kena vakatoroicaketaki na nomuni bula raraba na noda Marama e na veikoro vakaviti kei na veitikotiko ena taudaku ni vei koro vakavalagi.

E sa vakadavora oti e vica na i tuvatuva na Matanitu e na kena yadravi ka qaravi na nomuni bula na Marama ka vakatalega kina ko ira na luveda gone yalewa.

Sa i kemuni oqo na noda lewe ni vanua ko ni dau guilecavi se biu vakatikitiki tu na nomuni gagadre ka sega beka ni dau kauwai kina vakalevu na Veitabana Vakamatanitu e na veigauna sa oti.

E na vuqa na gauna o ni dau tauri tu ga mo ni vakarau ni ka. Sa vaka me i tovo tu ni bula ena gauna edaidai mo ni veiqaravi e loma ni vale ka me neimami tu na turaga na vakaoti gauna e na yaqona.

E na veitalanoa oqo, au na bolei keda na turaga e da tiko edaidai meda veisautaka na mataqali rai vaka oqo.

Na Tabacakacaka ni Marama

Na Tabacakacaka ni Marama e na noda Matanitu e veiqaravi e na bula raraba me baleti kemuni na noda Marama ka vakakina na luveda goneyalewa.

E sa vakacuruma mai eso na lawa vovou e na kena vakaqaqacotaki na nomuni dodonu na Marama. E mai tavoci na lawa me maroroi kina na Marama mai na nodra dau vakayaco i tovo kaukauwa na Turaga vei kemuni. Ia oqori e vica walega na sasaga ni noda Matanitu me kauta mai na veivakatautauvatataki vei keda kece sara, ka me kua ni vakabibitaki na lawa me maroroya ga na turaga.

E sa veisau na veilawa makawa me vakaqaqacotaka na nomuni dodonu, ia e na sega ni vakilai ka vakamatana na veisau kevaka e sega ni veisau na i tovo ni noda vakasama. Oqo na noda na turaga, ka vakakina na nodra vakavulici ka vakauqeti na noda marama me ra dau tutaka na nodra dodonu kei na kedra yaga dina e na loma ni noda veikorokoro kei na i tikotiko e na taudaku ni veikoro lelevu.

E matata tiko vei keda na tiko rawa edaidai ni takele dina tiko ni noda vei matavuvale o ira na noda marama tina. Era nuitaki me ra kauta mai na sautu, na veilomani kei na cakacaka vata e na loma ni matavuvale.

E na taudaku ni matavuvale, e bibi sara na nodra itavi e na kena tarai cake na bula vakailavo kei na bula veimaliwai

Eda rawa ni kaya ni ra Sui-tu ni noda veikorokoro kei na i tikotiko.

Sa i koya oya na vuna e sa ka marautaki kina vei au ni mai dola e dua na vale vaka oqo me nomuni na marama e Buretu. Ni vakayagataka vinaka me kauta mai na vuli ka yaga ka veivukei e na nomuni rawa ka me baleta na nomuni matavuvale ka vakakina na nodatou vanua.

E vitu (7) taucoko na vale vaka oqo e sa mai tara oti e na veiyasa iViti. E tolu (3) e na dola tiko e na yabaki oqo ka rua tale me na dola ni se bera ni cava na yabaki oqo. Na kena vo e na qai laurai malua tiko yani.

E sa gagadre tiko ni Matanitu me na kauta mai na bula sautu kei na rawa-ka vakailavo na vei vale vou oqo. Me i vurevure ni veiwekani vinaka kei na kalougata vei keda kece sara e na vanua vaka Buretu ka vakabibi mera kune veika vinaka kina na luveda kei na makubuda e na veigauna mai muri.

E na nodatou koro oqo e nanumi tiko, kau kila ni sa tekivu tiko na kena vakasaqari ka tawai tavaya taki na waiwai niu (Virgin Coconut Oil) kei na cakacaka ni liga.

Oqo e dua na i vakaraitaki vinaka ni kena vakayagataki na noda i yau me i vurevure ni kalougata vei keda. Eda sa vulica sara ga na kena vakayagataki na vuli me vakaisaluwaki ni i yau me kauta mai na sautu kei na tiko vinaka

Au sa taura na gauna oqo me’u vakavinavinakataki kemuni kece sara na vakaitavi e na kena mai vakavatukana na sasaga yaga oqo. Na Tabacakacaka ni Marama, kemuni na i Soqosoqo ni Marama e Buretu kei kemuni na turaga bale ni nodatou vanua, e na nomuni rai yawa kei na veivakadonui me ra vakaiyaragitaki na noda marama e na cakacaka ni rawa ka me tou kalougata kina.

E na vica na mala ni vosa oqo, e sa ka ni marau vei au me’u mai dolava tiko na nomuni Vale na marama e Buretu.

Vinaka vakalevu.