Virus failne ki jaankari
Pichle chaubees (24) ghanton mein aaj subha aat baje tak COVID-19 ke 156 naye mamle saamne aaye hai. 79 mamle Western Division ke hai aur 73 mamle Central Division ke aur 3 Eastern Division ke hai. Ministry ke COVID-19 dashboard aur Fijian Government ke Facebook page par aaj raat online publish ki jaayegi. Aap iss link par jaakar naye aur active mamlon ki locations tatha recoveries mamle dekh sakte hai:
http://bit.ly/3vE2ZBb
Kadavu mein COVID-19 ke chaar naye mamle miley hain. Terah naye mamle Yasawa dwip ke Naviti ke hain. Sabhi marizon ko isolation mein rakha gaya hai.
Kal se lekar aaj ke beech 696 mareez theek huwe hai jiska matlab hai abh 15,997 active mamle hai. Central Division mein kul 4,522 active mamle hai, Western Division mein kul 11,164 mamle, Northern Division (Macuata) mein chaar active mamle hai aur Eastern Division (sabhi Kadavu) mein kul 307 mamle hain. Hum abhi apne active mamle aur theek hone waale database ko review aur reconcile kar rahe hai jiske falswaroop aane waale saptah me theek hone waale marizon ki sankhya badhne ki sambhaona hai.
Isi saal April mein shuru huwe prakop ke dauraan 47,795 mamle saamne aaye. Pichle saal March mein desh ka pehla mamla saamne aane ke baad Fiji mein 47,865 mamle saamne aaye aur 31,041 mareez theek huwe hai.
Mauton par jaankari
Aaj COVID-19 ki wajah se kisi ki maut hone ki report nahi mili hai halaki doh mauton par chaanbin jaari hai.
Fiji mein COVID-19 ki wajah se abh 508 logon ki maut ho gayi hai, iss saal April mein shuru huwe prakop ke baad 506 logon ki jaan gayi hai. Kripya dhyaan de ki clinical teamo ko chanbin karne, classify aur maut ki report dene ke liye joh samay lagta hai, isi liye chaar dino ka interval diya jaayega taaki maut ki taarikh ko dekhte huwe, saat dino ke average mauton ka hisaab rakha jaayega taaki average ki report se pehle sahi data batora jaaye. Isiliye 31
st August tak saat dino ka average dainik COVID-19 maut ek din mein paanch hai. Saat dino ka average dainik COVID-19 maut Central Division mein 1 aur Western Division mein 3 hai.
COVID-19 ke liye positive paaye gaye 319 logon ki maut anye gamheer bimaari ki wajah se huwi hai joh unke COVID-19 ke liye positive paaye jaane se pehle huwi thi. Inn mauton ko COVID-19 karar nahi diya gaya hai.
Aspatal mein marizon par jaankari
COVID-19 ke 204 mareez aspatal mein bharti hain. Lautoka aspataal mein 84 mareez bharti hai. FEMAT field aspatal mein 17 mareez bharti hain, CWM, St Giles aur Makoi mein 103 mareez bharti hain. 20 mareezon ki halat gambheer batayi ja rahi hai aur 9 ki haalat nazook hai.
Screening ki jaankaari
4
th September, 2021 tak: Stationery screening clinics par kul 5,329 logon ko screen kiya gaya aur 239 logon ko swab kiya gaya, jisse abhi tak stationery screening clinics par kul (total) 541,848 logon ki screening aur 91,405 logon ko swab kiya gaya hai. Abh tak hamari mobile screening teams ne 2837 logon ki screening ki aur 90 logon ko swab kiya jabki jabse mobile screening program shuru huwa hai tabse hamari mobile teamo ne abhi tak kul (total) 819,504 logon ki screening aur 72,871 logon ko swab kiya hai.
Testing par jaankaari
Iss saal April mein prakop shuru hone ke baad kul 339,443 samples test huwe hai, jabki pichle saal ki shuruwaat se abhi tak 382,304 test huwe hai. 4
th September ko 1297 tests report huwe hai. Pichle saat dino ka dainik test average taor par 1,377 tests prati din the yaani 1000 logon mein 1.6 tests. Saptah mein 1000 population mein 10.7 tests karne se yeh WHO ke anushaashit sthar 1000 population mein se chaar tests se zyada hai. Pichle saat dino mein dainik test positivity 19.7% hai joh dhire- dhire neeche jaa raha hai lekin yeh abhi bhi sanket deta hai ki samaaj mein virus fail raha hai.
Sui lagane ki jaankaari
3
rd September tak desh bhar mein 566,210 bade logon ko sui ka pehla dose aur 299,943 logon ko dusra dose lag chuka hai. Iska matlab hai ki desh bhar mein target population ke 96.5% logon ko pehla dose aur 51.1% logon ko dusra dose lag gaya hai yaani weh puri tarah vaccinate ho gaye hai. Hum abhi apne pahle dose waale abhiyaan par ek exercise kar rahe hai, jisse hume mauka milega ki hum unn ilaakon ko lakshit kare jahan kam logon ko sui lagi hai aur iske alawa apne wartaman sui lagane waale kariyekram ke liye sudhaar kar sake ki kul kitni aabadi ko sui lagwane ka laksh hai.
Fijiwaasiyon ko yaad dilaya jaa raha hai ki weh Ministry ke vaccine dashboard par jaakar dekhe joh national, divisional aur sub-divisional level par pehla dose aur dusre dose par jaankaari deta hai. Aap iss live dashboard ko yahan:
http://bit.ly/3h2JfCZ par dekh sakte hai.
Mahamaari ki Outlook
Pichle saat dino mein COVID ke naye mamle ki sankhya average taor par prati din 263 mamle ho gaye hai yaane ek million logon mein 297 mamle. Jaisa ki pehle Permanent Secretary ne ghoshna kee thi Suva-Nausori ke dainik mamle ki sankhya ka upyog karke abhi mahamari ke progress ka sanket nahi diya jaa raha hai. Ministry anye sanket jaise ki test positivity, aspataal mein kitne log bharti hai aur kitni kitni logon ki maut huwi par nigraani rakhe huwe hai aur mahamari ke progress ko aank rahe hai.
Testing numbers me girawat hone se, testing numbers prati saptah WHO ke sujhao 1000 population me chaar hai (ya prati saptah 3500 tests) hai. Hum abh samaaj mein Surveillance testing par gaor karenge aur positivity rates rokthaam ke phase ke level tak jaane lage hai.
Aam janta ko salaah
Gambheer COVID-19
Yeh lagataar chinta ki baat bani huwi hai ki kuch log bimaari ki stithi gambheer hone ya antim charan mein pahuchne par hi aspataal jaate hai. Jaisa ki aaj Permanent
Secretary ne kaha hai: iss mahamaari ke dauraan COVID-19 se 78% logon ki maut ghar par huwi hai, ya aspataal jaate samay huwi, ya bharti hone ke doh dino ke andar huwi jisse clinical team ko jaan bachaane ke liye ilaaj karne ka thoda ya kuch bhi mauka nahi mila.
Gambheer COVID-19 ek medical emergency hai aur derr mein iska ilaaj karna iss bimari se bachne ke mauke ko kam karta hai. Agar aap ki umar pachaas saal se zyada hai ya aapko non communicable disease hai ya diabetes, hypertension, dil ki bimari, kidney ki bimari, motapa ya garbhwati hain toh COVID-19 se aap ko zyada khatra hai.
Gambheer bimari se aapko zyada khatra hai agar aapko COVID-19 ke lakshan jaise khaasi, sardi, bukhaar, gale mein kharash, shareer mein dard, sar dard, swaad ya mehek na aana toh jald apni nazdiki screening clinic jaye aur hamari medical team se test karwaye.
Sabhi Fijiwaasiyon ko COVID-19 ke lakshan pata hona chahiye jinme shaamil hai:
• Saans lene mein takleef
• Chaati mein dard ya dabaao
• Kuch dino se gambheer sar dard
• Nayi uljan, jaagne ya uthne mein mushkil; aur
• Shareer ke chamde (skin), hont aur naakhoon, peele, gray, ya neele rang ke ho jaana.
Suva-Nausori rokthaam waale ilaakon mein humne kuch health facilities ki pehchaan ki hai jahan wohh log jaa sakte hai jinhe COVID-19 ke gambheer lakshan dikhaai dete hai.
Agar aap ya aapke chahne waale Suva-Nausori ke rokthaam ilaake mein rahte hai aur aapko gambheer lakshan hai toh kripya jald se jald in nirdharit health facilities jaaye.
- Colonial War Memorial Hospital (CWMH)
- FEMAT Hospital, Vodafone Arena
Nausori ke niwaasiyon ko agar gambheer lakshan hai toh weh:
- Nausori Health Centre
- Wainibokasi Hospital Western Division ke log: Agar aapko COVID-19 ke lakshan dikhayi de toh kripya apni nazdiki health facility jaaye.
165 par call kare agar medical facility nahi ja sakte.
Aur bhi COVID suraksha watawaran ke liye Ministry of Health aur Medical Services ne apne health service provision me remodel kiya hai. CWM aspataal apni sewaen samanye karne par kaam kar raha hai jahan weh COVID aur Non-COVID marizon ko dekhenge. Inme shaamil hai aur bhi COVID suraksha ke taor par apne outpatients aur aisi sewaen fir se jaari karna jo emergency nahi hai. Heads of Department ke saath Clinical Governance aur Infection Control teams kuch niyamo par kaam kar rahi hai jiska upyog karke mariz in Specialist Sewa se laabh utha sakenge.Inme shaamil hai khatre ke liye marizon ki jaanch karna aur karamchaari tatha marizon ki surakcha ke liye apne Infection Prevention aur Control niyamo ko fir se vavsthit karna. Special outpatient patient clinic (SOPD Clinic) pahle hi ek digital platform par shuru ho chuka hai jahan marizon se virtual taor se waartaaye ho rahi hai. Marizon ko call karke baatchit karne ke baad unhe dawaaiyan di jaati hai. Blood test forms bhi viber ke duara marizon ko bheja jata hai taaki weh apni nazdiki Health Centre me blood test karwa sake. Kuch sewaen jaise ki rakt daan, bloodletting sewa aur SOPD prescription ko refill karne ki sewaen aur bhi khule taor se ho rahi hai.
North mein aam janta ko yaad dilaya jata hai ki yeh zaroori hai ki Vanua Levu bhar mein log salah maane aur COVID-19 suraksha niyam ka paalan kare. North mein sabhi mamle jabki Nabouwalu jetty se jude hai aur humne Nabouwalu mein sabhi pratibandh hata diye hai jabki Namara Tiri Settlement ke aakhri teen mamle par chanbin chal rahi hai jo Labasa shaher ke nazdeek hai. Iske alawa jabki sabhi ports par swaasth niyam aur sakt kiye gaye hai lekin samaaj mein virus failne ka khatra bana huwa hai ki. Abhi, sui lagana aur COVID suraksha niyam bahut zaroori hai taaki samaaj me virus failne se roka jaaye.
Bahri duwipon me rahne waalon se Swaasth Mantralay aur Medical Services ne maang ki, ki weh Viti Levu tak gairkaanooni taor se aane-jaane ka kaam naa kare. Humne sthaniye taor jo niyam laagu kiye hai wohh samaaj mein virus failne se rokne ke khatre par kaam kar raha hai. Iske alawa hum village ne neta aur bade-buzurgon se fir maang kar rahe hai ki weh duwipon ki suraksha ke liye hamare prayaaso ka samarthan kare aur apne samaaj mein gair kanooni taor se aane-jaane waale kadam ki reporr kare aur apne samaaj me quarantine aur isolation niyam laagu kare taaki iss tarah safar karne waalon par kadam utaaya jaaye.
Fiji ke baaki ilaakon ke liye, curfew ke ghante badalme aur antim sanskaar me bees logon ko bhaag lene ka mauka dene se COVID suraksha niyamo ka ulanghan nahi hona chahiye. Hamare paas jabki shopping karne ya anye zaroori kaam ke liye aur samay ho gaya hai, Ministry of Health aur Medical Services aam janta ko salah de raha hai ki swaasth suraksha ke anye niyam abhi bhi laagoo hai. Hum apne kuch niyamo par vichaar kar rahe hai toh aise me kripya behad zaroori na ho toh apne ghar se naa nikle.
Mask pehnne agar ghar se nikalte hain, haath ko hamesha saabun paani se dhoye ya hand sanitiser ka istemaal kare, doh metre ki doori barkarar rakhe aur khaaste ya cheekte waqt apne mooh dhaak le; COVID-19 ke khilaaf suraksha ke liye yeh niyam abhi bhi behad zaroori hai.