HINDI - STATEMENT BY THE PERMANENT SECRETARY FOR HEALTH & MEDICAL SERVICES DR. JAMES FONG - 05.05.21

05/05/2021


Namaste.
 
Aur bhi 2065 tests hone ke baad kal se lekar abhi tak COVID-19 ke chaar (4) naye cases saamne aaye hai. Doh border quarantine cases hai - tatha dono sainik Golan Heights me peacekeeping duties karke laute hai. Kuch hi der me Dr Aalisha is cases ke baare me aur jaankaari dengi.
 
Hamare doh anye cases local hai. Unme se ek bahut hi gambheer haalat me hai- main iske baare me batana chahta hoon, ki yeh case kaise huwa. Hamara case 125, Lautoka hospital me bharti 53 saal ka aadmi hai jo isi saal 19th April ko surgical procedure ke liye bharti huwa tha. Unki surgery safal rahi. Lekin 28th April ko use saans lene me takleef huwi.
 
29th April ko is mariz ko 25 saal ke doctor ne dekha jo hamara case 120 hai. Is mariz se COVID-19 ke testing karne ke liye kaha gaya, lekin doh baar usne inkaar kar diya. Use dekhne waale doctor ko May 1st ko symptoms yaani chin nazar aaye aur kal doctor ko positive paaya gaya.
 
2nd May ko isi mariz ko 30 saal ke doctor ne dekha jo hamare case 121 hai. Hum jaante hai ki yeh doctor case 121 ko April 26th ko virus ke liye negative paaya gaya tha, use kal positive paaya gaya jab case 120 ke liye contact tracing ho raha tha aur uske results batate hai ki use yeh virus jald hi huwa hai.
 
Aaj din me iss mariz ki halat bigadne lagi. Aadmi ko intensive care unit me khiskaya gaya  aur virus ke liye uska test kiya gaya. Chaar ghante pahle hi aadmi ko COVID-19 ke liye positive paaya gaya. Is mariz ki haalat par unke pariwaar waalon se aur baatein karne ke baad ise aam kiya jaayega. Iss mariz ne jo jaankaari di tatha uski halat bigadne se yahi sanket milta hai ki usko yeh virus pahle se tha. Hume shak hai ki yeh mariz jo case 125 hai, ne doctors ko virus failaya tha, doctors ne usko nahi.
 
Hume pata nahi hai ki is mariz ko yeh virus kaise huwa hai. Hume dono pahlu par gaor karna hoga. Dekha jaaye toh ICU cases- joh abhi hamare paas hai- hume khatre ka sanket de raha hai ki samaaj me yeh virus bahut zyada fail gaya hai. Yeh hume bata raha hai ki virus ke aur bhi cases baahar hai. Humne pichle saal March me apne pahle case ke din ke baad iss tarah ki sabse kharab stithi nahi dekhi thi. Is dauraan humne iss din ke liye taiyaari karne me kadi mahnat ki hai. Yojna banane me mahino lage.
 
Hamari pahli priority hai in cases ko Lautoka Hospital ke andar hai kaabu me karna. Hospital se is virus ko aur failne se rokne ke liye, police aur sena ne Lautoka Hospital ko kuch hi ghanton ke andar lockdown kar diya hai-woh ab rokthaam waala ilaaka hai aur woh sirf COVID care facility hai.

400 se zyada patients, doctors, nurses, aur anye staff ko alag-alag kar diya gaya hai aur unhe hospital ke andar quarantine me rakha jaayega jab tak hume pata nahi chal jaata ki is mariz ke contact me koun-koun se log aaye the koun nahi. Kuch staff jo hospital se chale gaye the ko waapas bulaya gaya hai. Sena aur police ne poore hospital me ring fence laga diye hai tatha sakt roop se nazar rakh rahe hai ki koun hospital  ke andar jaata hai.

Lautoka Hospital public ke liye bandh rahega, sabhi medical services ab back-up hospitals jaise Nadi, Ba, aur Sigatoka, tatha Punjas aur Kamikamica health centres Lautoka se pradaan ki jaayengi. Humne puri sarkaar se madad li hai taaki hamare logon ko zaroori services milti rahe. Jaisa humne pahle announce kiya tha rokthaam waale ilaake yaani containment areas ke borders unn logon ke liye khule hai jo apna ilaaj karane videsh safar karna chahte hai to iski suvidha pahle se pradan karni chahiye.

Jabki aur cases tatha gambheer cases saamne aane ki sambhaona hai toh aise me Lautoka Hospital ke andar sections ko intensive care units me badla jaa raha hai jisme aur bhi khaat aur ventilators honge. 

Lautoka Hospital ke staff wahin rahenge tatha hospital ke andar kaam karenge jabki contact tracing jaari rahegi. Yaad rahe ki hamare doh doctors ke quarantine me jaane se aur unke contact me aane ki wajah se pahle hi hospital ke staff par asar pada hai.  Jo kaam karenge woh bilkul high alert par rahenge aur surakchit equipment pahanenge aur rakhenge. Unka har din screening aur testing hoga.Unhe hum zaroorat ki saari cheeze aur sahyog denge. Bhojan, zaroori saaman sabkuch hum denge. 

Na sirf hospital me balki Lautoka bhar me aur testing hogi.
 
Hamari swaasth sewa network me COVID management protocols aur mazboot ho rahe hai taaki baaki jaghon par samanye sewa pradaan ki jaaye aur Lautoka hospital se marizon ka boj kam ho.
 
Hamara anye local case,  27 saal ki ek mahila hai hai jo Narere mein rehti hai. Makoi ke ek case ke contact mein aane ke kaaran woh 28th April ko quarantine mein gayi. Aur chanbin se pata chala hai ki 17th April ko Makoi me ek family gathering ke dauraan woh Makoi ki ek anye case se mili juli thi. Aaj subha hi mahila ko COVID-19 ke liye positive paaya gaya. Iss family gathering ki wajah se COVID-19 ke teen cases huwe hai. Yeh ek choti family gathering thi jisme kuch hi pariwaar shaamil huwe the lekin yeh desh par asar karne ke liye kaafi tha. Isiliye hamara sab se pehla aur zaroori swastha niyam tha ki Fiji bhar me kahin bhi ek jagah ikkatta na ho.
 
Iss mariz ke ghar walo ko 29th April se quarantine mein rakha gaya hai aur abhi weh sab COVID-19 ke liye negative test huwe hain.
 
Uske quarantine mein jaane se pahle hi uske ghumne firne par uska contact tracing shuru ho gaya tha, Dukh ki baat hai ki uske phone me careFIJI app download nahi tha. Ab woh yaad kar kar ke bata rahi hai woh kahan-kahan gayi thi aur kis kis se mili thi.

Agar uske paas careFIJI app hota aur usne ise on rakha hota toh yeh sab kaam bahut asaan ho sakta tha. Fiji me 250,000 se zyada careFiji apps download ho chuke hai tatha Fiji bhar me kai log app ko apna rahe hai, aap sabhi ko dhanyawaad jinhone jaan bachane waala asaan sa kadam uthaya hai. Lekin hamare contact tracers ki orr se, main aur app download karne ki maang karta rahunga jab tak number 600,000 ke paar naa ho jaaye jitna hamare desh me smartphones hai.

Ra me COVID-19 kaise faila iska genomic sequencing result, Melbourne stith Peter Doherty Institute ki Microbiological Diagnostic Unit (MDU) se aa gaya hai. Hum yeh bata sakte hai ki iss mariz ka virus, Fiji me anye cases ki tarah hai aur yeh wahi B1617 prakop hai  jo sabse pehle India me mila tha. Isiliye, abhi tak hume yeh pata nahi hai ki kya yeh case anye local cases se linked hai jo border quarantine facility waale cluster se juda hai. Jabki yeh genetic link ek acchi khabar hai, lekin ek dusre se link na milna yeh sanket deta hai ki samaaj me aur bhi logon tak yeh virus faila tha ya fail raha hai.  Iss cluster se jude aur bhi kayi mamle samaaj me honge jo abhi tak hume nahi mile hai.
 
Fiji mein abhi 3 cases hai jiske baare me pata nahi hai ki yeh kaise faile hai, case 116 – Ra ka dursa aadmi jiska sample genetically Melbourne sequence ke liye bheja gaya hai,  case 120 jo Lautoka Hospital ke 25 saal ka doctor hai aur Lautoka Hospital ka mariz jise aaj hi COVID-19 ke liye positive paaya gaya hai. Halaki jaisa humne pahle kaha tha, hume lagta hai ki is mariz ne doctor tak yah virus failaya tha.
 
Lautoka aspatal mein sthiti ki gambhirta ko dekhte huwe, Ministry ki salah hai ki abhi ke saare rokthaam waale ilaake  yaani containment areas ke borders nahi hataye jaaye. Bhojan, fuel, freight aur medical evacuations inn rokthaam/containment ilaako ke borders se hote huwe jaayenge.
 
Fijiwaasiyon, main “war yaani yudh” shabd ko halke se nahi leta. Lekin abhi, hum iss virus ke saath yudh kar rahe hai tatha yeh frontline se Lautoka Hospital tak faila hai. Yeh hamari swasth pranali yaani healthcare system ka abh tak ka sabse bada test hoga – aur hum sab ke liye bhi yeh ek test hai. Kai logon ki zindagi khatre me hai, sabhi Fijiwaasiyon ko balidaan (sacrifice) dene ki zaroorat hai. Yeh virus chal yaani kapti hai aur iska koi bharosa nahi ki kab kahan fail jaaye. Samaaj me sirf ek case chahiye jiska pata naa ho ki kahan se aaya hai, isse yeh virus poore desh me fail sakta hai. Aur agar COVID-positive vekti ka pata nahi chal paya toh woh khud toh khatre me rahega balki poore desh ko khatre me daal sakta hai. Lekin agar woh vekti samne aa jaye, toh hum uski dekhbhaal kar sakte hai aur  desh ko bhi surakshit rakh sakte hain. Har din jaldi bimari ka pata lagne se hum iska ilaaj karne ka prayaas kar sakte hai aur hum ise rok sakte hai isse pahle ki yeh hamare kabhoo se baahar ho jaye.
 
Main janta hoon ki iss mariz aur uske parivaar ke liye hume dukh ho raha hai aur hum sabhi ko apne health care karamchariyo ke liye humdardi hai jo Lautoka Hospital mein rehte aur kaam kar rahe hain. Meri team Iss virus ko aur failne se rokne ke liye uss hadh tak jaegi jo socha nahi jaa sakta. Aur jaisa ki hamare Pradhan Mantri ne kaha hai, hamare fronliners humdardi se zyada deserve karte hain, weh izzat ke laayak hai. Aap hamari swasthiye upayo ka palan karke dikha sakte hai ki aap unki kis hadh tak izzat kar rahe hai. Chalo hum saath milkar yeh dikhaate hain.
 
Dhanyawaad.