HINDI - 8PM STATEMENT BY THE PERMANENT SECRETARY FOR HEALTH & MEDICAL SERVICES DR. JAMES FONG - 24.05.21

Aaj shaam che baje (6pm) tak COVID-19 ke teen (3) aur mamle hamare saamne aaye hai.
 
Pahle do cases Nadawa aur 7 miles Nasinu ke hai, aur weh Tacirua ke case 211 ke primary contacts hai.
 
Teesra case Samabula ka hai jo pahle announce huwe ek case ka primary contact hai.
 
Hum ab yeh kah sakte hai ki Australia bheje gaye pahle batch ke 7000 samples me se ek test positive aaya hai –shaam waali jaankaari me is sample ke test result par kuch shak tha, baaki samples ke tests negative aaye hai.
 
Hum yeh bhi bata sakte hai ki yeh positive sample, Lautoka ke Natabua Health Centre ka tha aur COVID-19 ke ek case ka contact tha aur jiske sample ko Fiji me baad me test kiya gaya tha. Mahila ko isolation me rakha gaya tha aur ilaaj ke baad woh theek ho gayi tatha usko ab release kar diya gaya hai. Is case me ab koi bhi kadam utaane ki zaroorat nahi hai, tatha case ka number nahi badhaya jaayega.
 
Ek mariz theek huwa hai, jiska matlab hai ki Fiji me abhi 99 active cases isolation me hai. Pichle saal March 19th ko Fiji me pahla case report hone ke baad, Fiji me kul 238 cases saamne aaye hai, 135 mariz theek huwe jabki chaar logon ki maut huwi.
 
Pichle saal ki shuruwaat se humne testing shuru ki tatha abhi tak total 90,325 COVID-19 laboratory tests huwe hai.
 
Kal total 1933 samples test huwe. Nadi Hospital laboratory ne 21st May se apni chaar nayi GeneXpert machines se COVID-19 ke liye testing shuru kar di hai tatha unke testing numbers ko din waale test counts me jode jaa rahe hai. Pichle saat dino me average taor par har din 2500 test hote aaye hai. Pichle saat dino me har din ki test positivity 0.4% thi aur aakhri din bhi 0.4% thi. Pichle saat dino me average taor par har din prati yaani per 1000 population me 2.8 tests huwe aur aakhri din prati (per) 1000 population me se 2.2 tests huwe.