HINDI - STATEMENT BY THE PERMANENT SECRETARY FOR HEALTH & MEDICAL SERVICES DR. JAMES FONG - 12.05.21

Namaste

Pichle chaubees (24) ghanton me 1910 tests karne ke baad  aaj COVID-19 ke nau (9) aur cases saamne aaye hai.

Kal announce kiya gaya tha ki Flagstaff Suva stith Extra Supermarket me kaam karne waale ek vekti ko COVID huwa hai. Uske saath kaam karne waale teen aur logon ko aaj COVID ke liye positive paaya gaya. Extra Supermarket ko saaf-safaai yaani (decontamination) ke liye bandh kar diya gaya hai jabki hum baaki ke karamchaari aur management ki test ke results ka intzaar kar rahe hai.

Extra Supermarket ne sakti se laagu kiya tha ki sabhi staff aur customers dukaan ke andar mask pahanne, phone me careFIJI app install kare aur Bluetooth on rakhe ya logon ke contact tracing ki jaankaari register ki jaati thi. Is wajah se humne jald se kai sau ki sankhya me contacts ki pahchaan ki.

Iss careFIJI app ke istemaal ke bina, supermarket jaise bhid yaani crowd waali jagah par contact tracing karna bahut hi mushikil kaam hai, khaas karke jabki hamari contact tracing teame, itne saare cases se nipatne ke liye har din overtime kaam kar rahi hai. Yeh careFIJI app hamare contact tracers ko yeh dekhne me madad karenge ki koun-koun se log, kahan par kin-kin logon ke kareeb aaye the. Agar aapka app ‘on’ raha aur yeh function kar raha hai toh hamare contact tracers aapko bata sakenge ki kya aap virus ke shikaar kisi vekti ke contact me aaye the. Aur mujhe pata hai ki sabhi log yeh janna chahenge.

Yeh ajeeb lagta hai ki jiske paas virus hai woh dusre vekti tak virus pahucha deta hai jabki dono ne mask pahan rakhe hai. WHO ne bataya hai ki hum ek aise prakop ka saamna kar rahe hai jo tez failne waala hai tatha jiske baare me pahle se kuch nahi kaha jaa sakta.

Jahan tak hamari contact tracing ka sawaal hai toh jin logon ki pahchaan careFIJI app ke zariye huwi ya jinki jaankaari contact tracing registry me hai jinme khareedbin karne waale shaamil hai se Ministry contact kar rahi hai. Jabki hum in logon tak pachuch rahe hai, toh hum un sabhi logon se khud ko anye logon se alag kar lene ki maang kar rahe hai jo pichle doh saptah me Flagstaff stith Extra Supermarket ya Makoi stith Hanson’s Supermarket gaye the.Hamare list me jitney log hai sabhi se contact karne ke baad hum announce karenge. Jin logon ka in naye cases se koi contact nahi paaya jayega ko self isolation se nikalne ka mauka diya jayega.

Main un sabhi logon ko yaad dilana chahta hoon jo khaane-peene ka saamaan lene ke liye dukaan jaate hai ki: dhyaan me rakhna chahiye ki aap apna mask pahene, apne phone par careFIJI app download kare aur hamesha phone ka Bluetooth ‘on’ rakhe jab aap dukaan par ho.  Maine dekha hai ki kuch supermarkets, online shopping aur home delivery ki sewa bhi de rahe hai – main logon se maang kar raha hoon ki woh in sewaon se faida utaaye, tatha anye supermarkets aur businesses se online shopping aur delivery ki sewa shuru karne ki maang karta hoon.

Hamare COVID ke mamle me aaj do aur log hai jo COVID ke lakshan yaani symptoms lekar Nausori Health Centre gaye the. Yeh pariwaar Lakena Nausori ka hai. Is pariwaar  do (2) logon ko test ke baad COVID-19 ke liye positive paaya gaya hai. Tatha hamari chanbin jabki shuru huwi hai toh abhi in dono cases ka anye cases se koi link nahi mila hai.

Is pariwaar ka ek sadasya Nausori market me vendor hai aur unki jagah par saaf-safaai yaani decontaminate kiya jaa raha hi. Jaisa main pahle kah chuka hoon, jaise hi kisi positive case ke baare me hume pata chalta hai, hamari contact tracing teame apna kaam shuru karti hai. Aapne hamari response teamo ko chanbin karte huwe dekha hoga – yeh kuch aisa hai jise hume is samay swikaar karna chahiye.

Hamara ek aur case Vunimono Nausori ka hai jo COVID jaise lakshan lekar health centre gaya tha aur test ke baad use bhi positive paaya gaya hai. Yeh case bhi abhi kisi anye case se linked nahi hai. Abhi tak Nausori me mile che (6) cases ke beech koi link nahi mile hai. Jabki humne apni chanbin shuru ki hai toh hum in cases ko aise dekhenge ki yeh samaaj me faile hai jabtak kuch aur saabit nahi ho jaata.

Hamara aaj ka aakhri confirmed case, border quarantine me kaam karne waala staff hai jise routine testing ke baad COVID-19 ke liye positive paaya gaya hai. Iss staff ko is saal 1st May ko test karne ke baad negative paaya gaya tha. Hamari chanbin se abhi yeh pata nahi chal paya hai ki is staff ko virus kaise huwa. Jabtak hume iska pata nahi chal jaata hum is quarantine facility se kisi ko jaane ka mauka nahi denge.

Samaaj me itna zyada cases milne ki wajah se bhaari (large-scale) taor se contact tracing karne ki zaroorat hai jisme kai sau ki sankhya me contacts hai. Extra supermarket se jo virus faila hai woh bahut hi chinta waali baat hai.

careFIJI app ke kaaran yeh cases, garment factory waale cases se alag hai:. App ka istemaal hone se hamara kaam asaan huwa hai jahan hum Extra supermarket ke cases ke kareeb aaye logon ki pahchaan kar rahe hai.Hum in logon ko dhoond kar unki testing ek saath kar rahe hai.Aisi sambhaona hai ki aur bhi logon ko COVID ke liye positive paaya jayega.

Doh saptah pahle humne contact tracing karne ki wajah se snap lockdown kiya tha kyonki jaise sabko yaad hoga hume us samay iski bahut kam jaankaari thi ki hume woh contacts kahan milenge jinhe milna zaroori tha. Iss baar careFIJI ke data ne hume saaf taor se bata diya hai ki contact tracing ke liye hume kahan se contacts milna shuru hoga. Isi liye medical ki nazar se dekha jaaye to yeh stithi (situation) alag hai jahan hume jald se lockdown karne ki zaroorat nahi hai jaisa pahle kiya gaya tha.

Iska matlab yeh nahi hai ki samaaj me abhi aur positive cases nahi honge jo hume abhi nahi mile hai – yeh cases zaroor honge aur hume inhe jald se jald dhoodna hai. Lekin jo data hume pahle mil chuka hai, ke hum bahut abhaari hai tatha hume bharosa hai ki hum achanak se nahi balki samay lekar lockdown kar sakte hai.

Abhi hum vishwaas karte hai ki inme se zyada contacts Suva aur Nausori ke beech hai. Isi liye in ilaako me weekend se lockdown kiya jaayega. 
 
Suva aur Nausori ke liye chaubeeson (24) ghante ka curfew Friday 14th May ki raat gyarah baje se Tuesday 18th May ki subha 4am tak rahega. Suva aur Nausori ke rokthaam (containment) ilaakon ko ek kar diya jayega jahan single lockdown zone rahega. Sabhi log jabki ghar par surakshit rahenge, tab hamari team uss samay trace, identify aur jitni contacts ke ho sake tests karengi. Agar hamari chanbin se pata chala ki anye ilaake jaise Lami mein bhaari sankhiya me contacts hai toh hum lockdown ko unn ilaako tak badha denge.

Lockdown ke asar me aane se pahle hamare paas 48 ghanto se zyada samaye hai. Acchi tarah taiyaari karne ke liye yeh samay kaafi hai jo bina hulchul aur ashaanti ke bina ho sakti hai. Aapke paas apne ghar ke liye khaane-peene waale saamaan aur anye zaroori samaan kareedne ke liye poore do dino ka samay hai.

Agar aap kharidbeen karne jaa rahe hai toh aapko apne phone me careFIJI aap install karna hai aur Bluetooth ‘on’ rakhna hai – usse data khatam nahi hoga na hi battery down hoga. Agar aap supermarket jaate hai aur apko bheed dikhayi de, toh usme shaamil hokar samasya aur naa badhaye. Isse aap apne aur apne chahne waalo ki zindagi dao par lagayenge. Bheed yaani crowd dekhne par dusri dukaan jaaye ya apni shopping dusre samay par karen. Agar aap dekhe ki COVID kanoono ka paalan nahi ho raha hai toh, 158 par report kare.  Businesses ko zimmedaari utana chahiye aur dhyaan me rakhna chahiye ki unke karamchari aur customers mask pehene, doori banakar rakhe, aur careFIJI app ka istemaal karen.

Curfew ke laagu hone ke kai ghante baad agar kisi ko emergency taor se bhojan ki sakt zaroorat huwi toh hum ek aur hotline number rakhenge taaki aap ispar call karen aur food rations aap tak pahuchaya jaayega. Hum uss number par kal aur jaankari announce karenge.

Viti Levu ke baaki hisson ke liye kuch naye niyam bhi lagoo honge, jabki hum abhi lockdown ka assessment kar rahe hain. Shaniwaar 15 May 2021 se, har din poore Viti Levu ke liye curfew shaam che 6pm baje se agli subah chaar 4am baje tak kar diya jayega. Viti Levu ke bahar anye ilaako mein curfew hours raat 11pm se 4am tak hi rahenga.

Iska matlab hai ki agar Suva aur Nausori ke beech lockdown samay par khatm hota hai to bhi yahan curfew shaam che baje se subha chaar baje tak hoga.

Toh saaf taur par bata de ki: Suva aur Nausori me Friday ki raat 11pm baje se Tuesday ki subah 4am tak lockdown rahega. Iska matlab hai ki inn ilaake ke logo ko ghar par rehna hai.  Viti Levu ke anye ilaako ke liye curfew Saturday ki shaam 6pm se agle din subha 4am tak rahega. Aur Fiji  ke baaki ilaako ke liye curfew 11pm baje se subah 4am tak hi rahega. 

Saptahant hamari contact tracing aur testing ke baad rokthaam ke niyam par aage kuch  kaha jaa sakta hai. Hum jo bhi kadam utaayenge iss baare me aapko samay se pehle jaankaari pradaan karenge.

Main jaanta hoon ki kal humne kuch logo ko jaldbaazi mein khareedbin karte huwe dekha, Jab main bheed (crowd) ko dekhta hoon, toh mujhe logo ki zindagi khatre me dikhti hai. Mujhe ICU’s mein maut se ladte huwe mariz dikhayi dete hain. Aur main manta hoon, ispar mera jawab kaafi sakt tha. Mujhe darr tha ki supermarkets mein iss tarah ki hulchul se bahut se logon ko virus ho sakta hai- Mujhe ummeed hai ki koi mujhe ispar galat saabit karen.
 
Yeh samay badal sakta hai, yeh ek bhayanak bimari hai, aur main samajhta hoon ki kyun hum mein se kayi ne jaldbaazi me yeh kadam utaya. Main samajhata hoon ki yah sthiti hamen chintit kar sakti hai. Mujhe pata hai ki aapko apne pariwaar ki zaroorton ka khayaal rakhna hai. Lekin humari suraksha karne ke tarike hai. Hum mask pehen sakte hai, dusron se 2 metre ki doori rakh sakte hain, apna haath dho sakte hai aur careFIJI app download karke Bluetooth on rakh sakte hai. Sab se zaroori baat, ki di gayi sacchi jaankaari par hi humko faisla karna chahiye. Hum sachaayi saamne aane ka intezaar kar sakte hai aur uske aadhaar par hi kadam utaaye.

Hum is sthiti ke badlne ki khabar jitni jald ho sake aam janta ko dene ki koshish karte hai. COVID-19 ke baare me jaakaari ke liye mera bayaan aur Fijian Government ka Facebook page official sources hai jahan se jankaari leni chahiye. In jaankaariyon ka istemaal kare, aur up-to date rahe. Afuwa, bekaar ki baate aur jhooti jaankaari hamein bahut gehre andhere me lejayegi. Hamein shant rehkar, raaste se batakna nahi hai aur jahan tak ho sake apne ghar par rehna hai. Agar aapke paas kahin jaane ka thos kaaran ho toh baahar nikalne se pahle, mask pahne, doori barkarar rakhe aur dhyan me rakhe ki aapke paas careFIJI app ho aur Bluetooth ‘on’ rahe. Aao chale zimmedari se iss 48 ghanto ka istemaal kare, aur yaad rakhe: Hum iss ladaai me saath hai. Ministry jo bhi karta hai, aap ke liye, aapki suraksha ke liye tatha, desh ki suraksha ke liye karta hai.

Eid kal hai jo ki, woh jashn hai jo ramzaan ke paak mahine ke annt me manaya jaata hai. Har saal, yeh teen dino ka jashn pariwaar waalon aur dosto ke saath manaya jata hai. Yeh aisa samay hota hai jab hum ek hi mez par saath manate hai aur masjid me ikatha hokar ibadat karte hai. Iss saal kuch alag rahega. Hamein apne ghar waalon ke saath ghar par hi rahena hoga. Yah balidaan vishvaas dilaata hai ki hum sab — jo is virus ke liye sabse kamzor hain -  agle saal zaroor jashn manaane ke liye ek saath honge. Toh please, Iss Eid, ghar par rahe, apne pariwaar se dur na jaaye. Main un sabhi ko  "Eid mubaarak" kehta hoon, jo ghar par ise surakchit manayenge.

Dhanyawaad.