Virus failne ki jaankari
Pichle chaubees (24) ghanton mein aaj subha aat baje tak COVID-19 ke 781 naye mamle saamne aaye hai. 626 mamle Western Division ke hai, 154 mamle Central Division ke hai tatha ek mamla Eastern Division ka hai.Inn mamlon par puri jaankaari Ministry ke COVID-19 dashboard aur Fijian Government ke Facebook page par aaj raat online publish ki jaayegi. Aap iss link par jaakar naye aur active mamlon ki locations tatha recoveries mamle dekh sakte hai:
http://bit.ly/3vE2ZBb
Kal se lekar aaj ke beech 862 mareez theek huwe hai jiska matlab hai abh 21,211 active mamle hai. Central Division mein kul 12,940 active mamle hai, Western Division mein kul 8,270 mamle aur Northern Division mein ek active mamla hai. Kripya dhyaan de ki Suva se gaye doh mamle jinhe Northern Division ke quarantine facility me positive paaya gaya, aur kal iski ghoshna ki gayi thi, active mamle nahi hai kyonki weh pahle bhi Suva me positive paaye gaye the aur North jaane se pahle unki ginti Central waale mamle me ki gayi thi.
Hum abhi apne active mamle aur theek hone waale database ko review aur reconcile kar rahe hai jiske falswaroop aane waale saptah me theek hone waale marizon ki sankhya badhne ki sambhaona hai.
Isi saal April mein shuru huwe prakop ke dauraan 42,541 mamle saamne aaye. Pichle saal March mein desh ka pehla mamla saamne aane ke baad Fiji mein 42,611 mamle saamne aaye aur 20,677 mareez theek huwe hai.
Mauton par jaankari
15th August se 19th August ke beech COVID-19 se aat (8) logon ki maut huwi hai. Doh maute Western Division mein jabki che Central Division mein report huwi hai.
COVID-19 se pehli maut Nakasi ke 77 saal ke ek aadmi ki huwi. Aadmi ki maut 17th August, 2021 ko uske ghar par huwi. Use sui nahi lagi thi.
COVID-19 se dusri maut Vatuwaqa ke 63 saal ke ek aadmi ki huwi. Aadmi ki maut 17th August, 2021 ko uske ghar par huwi. Use bhi sui nahi lagi thi.
COVID-19 se teesri maut Ba ke 88 saal ke ek aadmi ki huwi. Saans lene me takleef ki wajah se wohh Ba Mission Aspataal gaya tha. Uske pariwaar ne bataya ki ek hafte pahle se use bukhaar, khaansi aur saans lene me takleef thi. Bharti hone ke ek din baad 18th August, 2021 ko uski maut ho gayi. Aadmi ko sui nahi lagi thi.
COVID-19 se chauthi maut Suva ke 54 saal ke ek aadmi ki huwi. Saans lene me takleef ki wajah se aadmi CWM Aspataal gaya tha. Bharti hone ke gyarah din baad 19th August, 2021 ko uski maut huwi. Aadmi ko sui nahi lagi thi.
COVID-19 se paanchwi maut Navua ki 60 saal ki ek mahila ki huwi. Pandrah August, 2021 ko uski maut ghar par huwi. Mahila ko sui nahi lagi thi.
COVID-19 se chati maut Naitasiri ki 58 saal ki ek mahila ki huwi. Solah August, 2021 ko uski maut ghar par huwi. Mahila ko sui nahi lagi thi.
COVID-19 se saatwi maut Sigatoka ki 78 saal ki ek mahila ki huwi. Uski maut attarah August, 2021 ko uske ghar par huwi. Mahila ko sui nahi lagi thi.
COVID-19 se aatwi maut Suva ke 89 saal ke ek aadmi ki huwi. 19th August, 2021 ko aadmi CWM aspataal ke emergency department pahuchne par medical officer ne mrit ghoshit kiya. Iska matlab hai ki aadmi ki maut ya toh ghar par ya aspataal lejaate samay raaste me huwi hogi. Aadmi ko sui nahi lagi thi. Aadki ki maut ki ghoshna karne me der ki gayi thi kyonki Fiji Police Force ki forensic unit ispar chanbin kar rahi thi.
Jaisa ki Permanent Secretary ne apne bayaan me ghoshna ki thi: Eastern Division me ek maut par chanbin chal rahi hai. Yale, Kadavu ke Rakiraki Village me COVID-19 ke pahle mamle ki ghoshna ki hai. Mangalwaar, 17th August, 2021 ko 63 saal ki ek mahila ko Kadavu ke Vunisea Aspataal pahuchne par medical officer ne mahila ko mrit ghoshit kiya.Iska matlab hai ki uski maut ghar par ya aspataal jaate waqt huwi. Mahila ke pariwaar ne report di hai ki use khaansi, bukhaar aur saans lene me takleef thi. Niyam ke tahat use swab kiya gaya aur use COVID-19 ke liye positive paaya gaya.Mahila ko sui nahi lagi thi. Iss maut par chanbin chal rahi hai jabki aur jaankaari tatha medical team duara death certificate milne ka intzaar kiya jaa raha hai.
Shuruwaati chanbin se sanket mile hai ki yeh mahila, anye logon ke contact me aayi thi jinhone bina swikriti ke Suva aur Kadavu ke beech safar kiya tha. Ek response team abhi wahan chanbin kar rahi hai tatha public health ki chanbin karne ke saath-saath contacts ko quarantine kar rahi hai.
COVID-19 ke liye positive paaye gaye teen aur marizon ki maut huwi. Lekin unke doctors ka kehna hai ki unki maut COVID-19 ki wajah se nahi huwi hai. Doctors ke anusaar in marizon ki maut unhe COVID-19 ke liye positive paaye jaane se pehle jo bimaari thi usi wajah se huwi hai.
Fiji mein COVID-19 ki wajah se abh 421 logon ki maut ho gayi hai, iss saal April mein shuru huwe prakop ke baad 419 logon ki jaan gayi hai. Kripya dhyaan de ki clinical teamo ko chanbin karne, classify aur maut ki report dene ke liye joh samay lagta hai, isi liye day dino ka interval diya jaayega taaki maut ki taarikh ko dekhte huwe, saat dino ke average mauton ka hisaab rakha jaayega taaki average ki report se pahle sahi data batora jaaye.Isi liye, 15th August tak saat dino ka average dainik COVID-19 maut ek din mein 11 hai. Saat dino ka average dainik COVID-19 maut Central Division mein 5 aur Western Division mein 6 hai.
COVID-19 ke liye positive paaye gaye 233 logon ki maut anye bimaari ki wajah se huwi hai joh unke COVID-19 ke liye positive paaye jaane se pehle huwi thi. Inn mauton ko COVID-19 karar nahi diya gaya hai. Jaisa ki pahle kaha gaya tha, Eastern Division me ek mamla saamne aaya hai jispar chanbin chal rahi hai.
Aspatal mein marizon par jaankari
COVID-19 ke 314 mareez aspatal mein bharti hain. Lautoka aspataal mein 119 mareez bharti hai. FEMAT field aspatal mein 37 mareez bharti hain, CWM, St Giles aur Makoi mein 158 mareez bharti hain. 45 mareezon ki halat gambheer batayi ja rahi hai aur 9 ki haalat nazook hai.
Screening ki jaankaari
Pichle chaubees (24) ghanton mein stationery screening clinics par kul 6,653 logon ko screen kiya gaya aur 2,261 logon ko swab kiya gaya, jisse abhi tak stationery screening clinics par kul (total) 473,045 logon ki screening aur 83,461 logon ko swab kiya gaya hai. 18th August tak hamari mobile screening teams ne 2,135 logon ki screening ki aur 71 logon ko swab kiya jabki jabse mobile screening program shuru huwa hai tabse hamari mobile teamo ne abhi tak kul (total) 794,488 logon ki screening aur 70,361 logon ko swab kiya hai.
Testing par jaankaari
Iss saal April mein prakop shuru hone ke baad kul 313,142 samples test huwe hai, jabki pichle saal ki shuruwaat se abhi tak 356,003 test huwe hai. 18th August ko 1,400 tests reporT huwe hai. Pichle saat dino ka dainik test average taor par 1,462 tests prati din the yaani 1000 logon me 1.7 tests. Pichle saat dino mein dainik test positivity 38% hai.
Sui lagane ki jaankaari
18th August tak desh bhar mein 539,555 bade logon ko sui ka pehla dose aur 223,987 logon ko dusra dose lag chuka hai. Iska matlab hai ki desh bhar mein target population ke 92% logon ko pehla dose aur 38.2% logon ko dusra dose lag gaya hai yaani weh puri tarah vaccinate ho gaye hai.Hum abhi apne pahle dose waale abhiyaan par ek exercise kar rahe hai, jisse hume mauka milega ki hum unn ilaakon ko lakshit kare jahan kam logon ko sui lagi hai aur iske alawa apne wartaman sui lagane waale kariyekram ke liye sudhaar kar sake ki kul kitni aabadi ko sui lagwane ka laksh hai.
Fijiwaasiyon ko yaad dilaya jaa raha hai ki weh Ministry ke vaccine dashboard par jaakar dekhe joh national, divisional aur sub-divisional level par pehla dose aur dusre dose par jaankaari deta hai. Aap iss live dashboard ko yahan:
http://bit.ly/3h2JfCZ par dekh sakte hai.
Mahamaari ki Outlook
Pichle saat dino mein COVID ke naye mamle ki sankhya average taor par prati din 543 mamle ho gaye hai yaane ek million logon mein 613 mamle. Suva-Nausori ke ilaako mein testing policing ke badlao ke karan dainik naye mamlon mein girawat ho rahi hai iske saath hi hamare dainik testing number bhi kam ho rahe hain. 21st July ko Permanent Secretary duara ghoshit kiya gaya tha ki abh Suva-Nausori ilaako mein sirf bade khatre wale logon ki testing ki jayegi. Aisa iss liye kiya ja raha hai taaki jaldi bimari ka pata chal sake aur COVID-19 ke khatre wale logon ki dekhbhaal ki ja sake tatha aur bhi logon ko virus se bachane ke saath-saath aur bhi logon ki jaane bachaai jaaye.
Hum Suva-Nausori illako mein iss testing policy me badlao ka asar dekh rahe hai jabki dainik mamlo mein girawat huwi hai. Iska matlab yeh nahi hai ki Suva-Nausori ilaako mein yeh prakop niche ki taraf jaa rahi hai. Permanent Secretary duara ghoshit kiya gaya tha ki Suva-Nausori ke mamlon ko dekh kar yeh anumaan nahi lagaya jaega ki prakop kitna hai. Mantralaye anye parikshan jaise test positivity, aspatal mein kitne mareez hai aur kitni maute huwi hai ke sanketon par bariki se nazar rakhe huwe hain.
Western Division mein mamle badh rahe hai jiska matlab hai ki virus samudao mein fail gaya hai. Western Division mein saat dino mein dainik maut ek din mein abh Central Division se zyada hai.
Northern Division mein ek mamla hai, aur Eastern Division mein koi bhi mamla nahi hai. COVID-19 ke liye positive paayi gayi mahila jiski maut Kadavu me huwi hai ke contacts ko aaj swab kiya gaya hai aur unke parinaam saamne aane par logon ko jaankaari di jaayegi.
Aam janta ko salaah
Northern Division me chal rahi chanbin par jaankaari
Nabouwalu me rokthaam ilaake ke teen din ho gaye hai. Nabouwalu waale mamle ke doh primary contacts ke alawa sabhi primary contacts ke chauthe din ke tests negative aaye hai.Baaki doh primary contacts ke parinaam abhi nahi mile hai. Filhaal, Immaculate Junior Secondary School par swaasth sewa ki jaa rahi hai joh aachi tarah kaam kar rahi hai. Labasa Aspataal se health teame har din Bua Nursing Station aur Lekutu Health Centre tak safar karte hai aur rokthaam waale ilaake se bahar logon ko swaasth sewa pradaan kar rahe hai. Nabouwalu aur North ke anye ports par border controls aur mazboot kiya gaya hai.
Nabouwalu rokthaam ilaake me joh gatividhi ki jaayengi unme shaamil hai:
1. Rokthaam ilaake ke niwaasiyon ko teen phases me screening aur swabbing karna. Screening ke pahle phase me, 367 logon ko swab kiya gaya. Sabhi tests negative aaye hai. 217 logon ke swabbing ka dusra round huwa jabki parinaam aana baaki hai.
2. Dainik lakshan ki jaanch aur swabbing
3. Ghar ghar jaakar COVID suraksha jaagruk kariyekram
4. Rokthaam ilaake me lakshit logon ko sui lagana
Rokthaam ilaake se baahar Nasavu, Naviqiri aur Nawailevu village ke ek hazaar se zyada logon ke swabs ko batore gaye hai.
Kadavu me chal rahi chanbin par nayi jaankaari
Jaisa ki Yale, Kadavu me Rakiraki Village me report huwe case ka sawaal hai toh, jaankaari ke anusaar iss mahila ka contact unn logon se huwa tha joh gairkanooni taor se Suva aur Kadavu ke beech safar kiye the, isi liye hum maante hai ki Kadavu island me yeh virus faila hoga.
Apni Public Health Rokthaam Niyamo ki madat karne ke liye hum aaj (19th August, 2021) se lekar ek saptah tak (26th August 2021) ke liye Kadavu tak jaane waali shipping sewaon ko suspend kiya jaa raha hai.
Gasele Nursing Zone ke liye chaudha dino ka rokthaam ilaaka sthapit kiya jaayega. Aisa isliye kiya jaayega taaki chauda dino ke liye virus nursing zone ilaake se baahar naa jaye aur is dauraan rokthaam waale ilaake me ghatna aur bimaari par nazar rakhi jaaye. Rokthaam ilaake me yah kadam utaaye jaayenge:
1. Virus ko aur failne se rokne ke liye rokthaam ilaake me saat villages ke beech ghumne firne par pratibandh rahega
2. Primary contacts ke liye ghar par quarantine laagu kiya jaayega
3. Primary aur Secondary contacts ki contact tracing jaari rahegi
4. Kamzor logon ki pahchaan karne aur unpar nazar rakhne ko badhawa diya jaayega
5. COVID suraksha bartaao ko protsaahit karne aur kamzor logon ki suraksha par khaas dhyaan dene ke liye Community engagement program ko badhawa diya jaayega
6. Sui lagwaane par shiksha aur lakshit aur kamzor logon ko sui lagane ko badhawa diya jaayega
Iske alawa ek clinical scouting team isi saptahant Vunisea bheji jaayegi joh dekhbhaal shamta ko badhane aur vishesh roop se pahchaane gaye kamzor logon ke liye dekhbhaal pahuch ko mazboot karne ke liye yojna taiyaar karegi.
Ministry of Health aur Medical services ne baahri dwipon (islands) me rahne waalon se ek baar fir maang ki hai ki weh gairkanooni taor se Viti Levu tak aane-jaane ka kaam bandh kare. Sthaniye taor se safar karne par jo niyam laagu hai uska paalan hona zaroori hai. Iske alawa hum sabhi village netaon aur buzurgo se ek baar fir maang kar rahe hai ki weh hamare prayaaso ka samarthan kare taaki hamare baahri dwipon ki raksha ho sake aur turant iski report kare agar aapke ilaake tak koi bhi gairkanooni taor se aate-jaate hai ya kisi par aisa karne ka shak hai.