Namaste,
Hamari mobile screening teamo ne kal se apni screening clinics par 25,064 Fijians ki screening ki hai. 1026 test ke baad COVID-19 ke
do naye cases saamne aaye hai.
Yeh cases Cunningham ki ek mahila ke paanch saal aur 15 saal ki betiya hai. Dono cases isolation me the. Pahle jab unhe test kiya gaya tha toh woh negative thi iska matlab hai ki dono public ke liye koi khatra nahi thi aur hamare contact tracing ke programme me koi uljhan nahi daal sakti hai.
Maine pahle bhi yeh kaha hai ki laagu kiye gaye kanoon ka palan karna zaroori hai kyonki har ek Fijian ki zindagi aur maut ka sawaal hai. Main aapko ek example de raha hoon ki kyon yeh zaroori hai aur yeh risk kitna gambhir hai. Cunningham ki jis mahila ko COVID-19 huwa tha ke pure pariwaar jinme saat (7) log hai sabhi ko yeh virus huwa hai. Yeh ek sabak hona chahiye ki yeh prakop kis tarah se fail raha hai aur sabhi ko niyamo ka palan karna kitna zaroori hai. Yeh niyam na kewal aapki raksha karte hai. Yeh aapke chahne waalo, aapke padosiyon aur yeh un sabhi logon ki raksha karte hai jinse aap milte julte hai.
Suva aur Nausori me lockdown huwe 24 ghante hone waale hai. Hamare paas sirf yeh ek hi sakt niyam nahi hai lekin hum samajhte hai ki humne ise lagu karke sahi faisla kiya hai. Aam taor se hum laksh banakar niyam laagu karte hai aur hum aisa karenge jab hume pata chalega ki yeh virus kis tarah se fail raha hai. Abhi Suva-Nausori ko bachane ke liye lockdown ki zaroorat hai.
Main sabhi ko bata dena chahta hoon ki ghar par jo samay aap bita rahe hai usi samay ka upyog karke hum logon jaane bacha rahe hai. Meri teame mauke ka upyog karke tracing kar rahi hai tatha khatre waale cases ki testing ki jaa rahi hai taaki virus ke failne ka chain toda jaaye isse pahle ki woh pure desh ko khaa jaaye.
Jaisa maine kal kaha tha, garment factory me kaam kar rahi mahila, hamare case 113 ke 877 logon se contacts the tatha yeh dono factories Lyndhurst aur Mark One Apparel me kaam karne waale hai.
Baarish me bhi kal raat lockdown ke dauraan humne contact tracing shuru ki jisse kuch badhaye pahuchi lekin hum sabhi 877 logon ka pata lagane me safal rahe jo case 113 ke contacts the. Yeh log mahila ke saat ek hi bus me safar kiya kate the aur ek hi jagah kaam karte the.
877 logon me se 833 logon ko screen karke test kiya gaya hai. Test kiye gaye 477 logon ko negative paya gaya hai jabki baaki logon ke samples test nahi huwe hai. Quarantine me rahne ke dauraan mahile ke nazdeek rahne waalon ki testing fir hogi aur aise shuru hoga ki mahila ke saath unka contact aakhri baar kab huwa tha. Aaj waale contact tracing se unhe aaj aur samples mile hai. Testing ke baad kal hume pata chalega ki lockdown Monday ki subha chaar baje (4am) khatm hoga ya nahi.
Lockdown ke karan logon ko jo mushkile ho rahi hai ko kuch rahat dene ke liye, 5000 food ration packs laadkar trucks, aaj subha hone se pahle Suva-Nausori Lockdown Zone tak pahucha diye gaye hai. Abhi un pariwaaro ko bhojan supply baata jaa raha hai jinhe inki behad zaroorat hai.
Hamari COVID-19 Food Ration hotline aaj subha se shuru huwi. Hume aaj din me barah baje tak 100,000 calls mile. Mujhe yeh jaankar nirasha huwi ki ek hi ghar se alag-alag numbers se call kiye gaye the. Humne kal yeh saaf kar diya tha ki bhojan ek ghar me rah rahe pariwaar ko baata jayega. Is tarah ke khel se un Fijiwaasiyon ko bhojan milne me deri ho rahi hai. Yeh khudgarz log, zarootmand pariwaaro ke liye badha ban rahe hai.
Hamare paas e-mail address bhi hai agar aapke calls ka jawab nahi mil raha hai. Agar aap email ka upyog kar sakte hai toh please kare kyonki hamari teamo ko jald aap tak pahucahne ka yeh sabse tez tarika hai. Aap apna naam, pata, pariwaar me kitne log hai aur apna mobile number
covid19rations@gmail.com par bheje. Hamari teame jitni jald ho sake aapse baatein karengi.
Ra me kal rokthaam yaani Containment area tay kiya gaya jo province me logo ke ghumne-firne ko kam karta hai lekin wahan business khule rah sakte hai. Humne abhi Ra ko lockdown nahi kiya hai. Hamari chanbin province me un do clusters par jaari hai jahan pata nahi hai ki virus wahan kaise faila. Isiliye Ra me aage chalkar sakt kanoon lagu kiya jaa sakta hai. Abhi jo Fijiwaasi rokthaam yaani containment area me rahte hai ko bilkul alert rahna chahiye. Aapke ghar ke bahar ke logon ko COVID-19 positive patient ki tarah dekhna chahiye.
Apne ghar me hi aap surakchit hai aur aapko wahin rahna hai. Agar aapko ghar se nikalna zaroori hai toh mask lagaye, dusro se dur rahe aur careFIJI app har wakt on rakhe. Agar aapke phone me careFiji app nahi hai to ghar se bahar naa jaaye. Apne phone me ise install kare ya kisi aur ko ghar se bahar bheje jiske paas app hai.
Main town aur city se bahar logon se ek appeal karna chahta hoon. Kabhi kabhi hum sochte hai ki town aur city se bahar rahna hume bacha sakta hai. Kuch communties ne khud iss lockdown measures ko apnane par kaam kiya hai. Isiliye islands aur town tatha cities se bahar logon se main maang karta hoon ki ho sake to apne communities me kisi ko aane na de. Iss ek upaye se aap aapne samaaj ko surakshit rakh sakenge.
Main abh apka dhyaan vacinees ki orr lejana chahta hoon. Iss virus ko kabu me karne, mahamari ko khatm karne aur fijiwasi ko surakshit rakhne ke liye sabhi ko vaccines lagwana zaroori hai.
Maine iss par pehle bhi baat ki hai, par kuch media vaccine ke asar par sawaal karte rehte hain, Maine pehle bhi kaha hai aur fir se kehta hoon, Fiji mein abhi tak koi bhi puri tarah vaccinated nahi hai. Puri tarah se vaccinate hone ke liye aapko in vaccines ke doh (2) doses ki zaroorat hoti hai aur fir iske asar ke liye aapko doh (2) saptah intezaar karna hoga ki woh aapke immune system me kis tarah asar karta hai. Sirf ek baar, jo Fijian eligible hai, use sahi level ki immunity mil jaaye to Fiji iss jaan lewa virus se safe ho jayega.
Hum umeed karte hai ki June mahine tak 100,800 vaccine doses me se 64,800 doses Fjii pahuch jaayenge jo COVAX ne dene ka wada kiya hai. New Zealand mein hamre dosto ko Kia Ora jo Fiji ko COVID-19 vaccines ka half million doses dena chahte hai. Hamein India se 100,000 doses bhi mile the saath mein hume umeed hai ki Australia ka bhi pehla 10,000 doses ka shipment agle saptah ayega aur baaki shipments har mahine par aate rahenge.
Abhi tak mile vaccines aur aage milne ka wada ko lekar hum bahut abhaari hai lekin yeh kaafi nahi hai aur naa hi woh jaldi aa rahe hai. Hum apne international partners ke saath nayi commitments par kaam kar rahe hai. Hamare abhi ke commitments me hum 484,000 fijians ko cover kar sakte hai lekin humein 650,000 logon ko cover karne ki zaroorat hai.
Jabki yeh prakop hum par hai to har din jitna jald ho sake zyada se zyada logo ko vaccines lagane ki zaroorat badhti jaa rahi hai.
Mujhe pata hain ki in vaccines ke kuch saptah me pahuchne ki umeed se hamare health measures jo saamna kar rahe hai use koi aaraam nahi milega. Yeh bilkul asaan nahi ki har roz ke kaam kaaj ke badle ghar par raha jaaye, lekin agar hum sabhi yeh koshish kare to hum ek baar fir iss virus ko rok sakte hai aur wapas normal zindagi kaam-kaaj, doston rishtedaaron se milna, shopping ya sports khel sakte hai. Jaisa ki maine pahle kaha hai ki hum yeh kadam nahi uthate agar hamare paas koi dusra raasta hota.
Koi bhi sarkaar akele iss virus ko nahi hara sakti. Pure desh ko saath milkar ise rokna hai, iska matlab ya hai ki har ek Fijian dusre Fijian par depend karte hai ki woh lockdown zone tatha rokthaam wale ilaake mein kanoon ka palan kare. Yeh ek ladaai ki tarah hai.Hum marne ke bare mein soch bhi nahi sakte aur samjhota bilkul nahi ho sakta. Hume ye ladaai jeetni hai aur hum jeetenge. Aur hum sabhi ko jee-tod koshish karne ki zaroorat hai.
Jab COVID ki baat aati hai, sabhi ke liye ghar par rehna hi sabse safe hai—lekin Fiji aur duniya bhar mein, hum jante hain ki lockdown ka ek apna hi badsurat pehlu hai. Ucchit resources aur support ke bina kamzor log aur bhi zyada kamzor ho sakte hain. Hamare Pradhan Mantri ne ghar par ladaai jhagde ko hamare samaj ki gambeer bimaari ka naam diya hai. Woh bahut sahi hai. Aur iss sankat ke samay hum jaante hai ki yeh gambheer apraad kai baar ho sakte hai. Abhi koi ghar par maar peet karne wale vekti ke saath fasa huwa hoga, aur yeh ek sachai hai jisse hum galat nahi kah sakte.
Isiliye main sabhi se maang karta hoon ki agar aap par, ya aap aise kisi ko jante ho jo ghar me maar peet, ladaai jhagde ke shikaar hai to aap National Domestic Violence Helpline number 1560 ya child helpline number 1325 par call kare. Madad aap tak zaroor pahuchegi. Aap saptah me kisi bhi din ya kisi bhi time call kar sakte hain aur apradh ki report de sakte hai. Yaha tak ki agar aapko kisi se baat karne ki zaroorat hai toh unn numbers par call kare. Yeh baccho, mahila aur purush ke liye bhi lagoo hota hai. Koi bhi iska shikaar ho sakta hai aur sabhi ke liye madad uplabd hai jinhe iski zaroorat hai.
Bahut sare log aur organisations hamari madad kar rahe hai, main aaj unn sabhi ko toh dhanyawaad nahi de sakta lekin khaas dhanyewaad main Psychiatric Survivors Association ko dena chahta hoon jinhone bhooke ko khana aur beghar ki screening karne mein hamari madad ki. Har kisi ke paas rehne ke liye ghar nahi hai lekin har kisi ke paas apne swasthiye ko gambhirta se lene ka haq hai. Toh PSA ko dhanyawaad.
.
Mere paas kuch acchi khabar bhi hai jo maine socha ki aakhir ke liye bacha kar rakhoon. Hamare active cases mein se teen theek ho gaye hai aur isolation se nikal chuke hain. Yeh log apne parivaar ke paas ghar jaa rahe hai.
Hamare kuch aur mariz abhi isolation mein hai aur khaas bimari ke karan high-risk category mein aate hai jinpar hum kareeb se nazar rakh rahe hai.
Lekin abhi tak ke liye hamare existing cases stable hain. Agar yeh virus hamare control se bahar ho jaati hai toh yeh hamare liye bahut bura hoga.
Agar hum kamzor logo ko isolation se door tatha ICU se door rakhna chahte hain toh hamein apne rokthaam ilaake ke andar hi rehna zaroori hai. Zindagi uss par tiki hai. Jo kiya jana chahiye uske peeche uska koi aur acha karan nahi hai. Ghar par rahe, Surakshit rahe aur zindagi bachaye.
Dhanyawaad.