HINDI - STATEMENT BY THE PERMANENT SECRETARY FOR HEALTH & MEDICAL SERVICES DR. JAMES FONG - 18.05.21

Namaste 

Apne ghar ke andar surakchit rahkar is briefing ko dekhne ke liye dhanyawaad.

Sabse pahle main un do marizon ke baare me jaankaari dena chahta hoon jinhe kal intensive care me bharti kiya gaya tha. Dono apne ilaaj par acchi tarah respond kar rahe hai. Hamari teame in marizon ki dekhbhaal acchi tarah kar rahi hai.

Kal se lekar aaj tak 2,500 tests karne ke baad hamare saamne COVID-19 ke chaar (4) naye cases aaye hai. Yeh saare cases Nadali ke cases ke close contacts hai.

Nadali me lagataar cases milne ki wajah se hum chintit hai ki Nadali, COVID failaane ka ek source ban gaya hai. Humne poore Nadali ilaake ko screening zone ke liye bandh kar diya gaya hai, jiska matlab hai ki, kisi ko Nadali se nikalne ka mauka nahi diya jayega jabtak sabhi logon ko screen, swab aur ilaake me sabhi log clear nahi ho jaate. Jo log in ilaakon me lautna chahte hai, laut sakte hai lekin weh fir in ilaakon se nikal nahi sakenge.

Jaise aaj din me announce kiya gaya tha, humne kal Northern Division me virus ke ek khatre waale case ki soochna di thi jab pahle Labasa ke rahne waale ek vekti ne COVID-19 test ke liye positive result register kiya tha. Lekin hume shak huwa ki yeh ek jhoota positive case hai kyonki iska test result samanya nahi tha. Humne jald se virus rokne waala action liya aur us ilaake ko bandh kar diya jahan yeh aadmi rahta hai tatha Labasa Hospital ke kuch section ko bhi bandh kar diya tha. Lekin acchi tarah chanbin karne, aur is aadmi tatha unke close contacts ke tests lagataar negative aane aur WHO se acchi tarah salaah lene ke baad hum kah sakte hai ki yeh ek jhoota positive test result tha.

Dunia bhar me yeh jhoota positive result kabhi-kabhi saamne aate hai. Hamare paas protocols hai jo in cases ki pahchaan kar sakte hai tatha is case me in protocols ne acchi tarah kaam kiya. Isi liye hum Northern Division me sabhi logon ko bharosa dilana chahte hai ki wahan abhi COVID ka koi case nahi hai. Aur humne, bhojan, freight tatha fuel wahan bhejne waale protocols ko aur mazboot kiya hai jise hum usi tarah lagoo rakhenge. 

Pichle chaar dino me hamari teamo ne kuch bhi samay nahi gawaya tatha Suva aur Nausori ilaake me COVID-19 ke cases ke contacts ko trace kiya. Logon ko yaad dilaya jaa raha hai ki yeh contacts woh log ho sakte hai jo COVID-19 ke marizon ke contact me aaye honge ya marizon ki wajah se untak virus faila hoga. Yeh zaroori tha ki hum in logon ko dhoond nikaale taaki hum unka test kare aur dhyaan me rakha jaaye ki weh apne samaaj me yeh virus aur logon tak na failaaye. Dhanye hai careFIJI app ke istemaal ko  jis wajah se hum jald se in contacts ki pahchaan karne me safal rahe. Anye contacts ki khoj karne me aur chanbin karne ki zaroorat thi. Humne Suva aur Nausori me kul 7,888 logon ko quarantine me rakha. Isse pahle humne itne zyada contacts ki pahchaan nahi ki thi.

Quarantine me contact ki sankhya safalta tay nahi karti hai balki dikhate hai ki humne kitna vikaas kiya. Yeh un Fijiwaasiyon ki pahchaan karte hai jo khatre me hai, hum unhe isolation me karte hai taaki virus ko failne se roka jaaye isse pahle ki yeh hamare kaaboo se baahar ho jaaye. Chaar dino ke sakt lockdown me aam janta ke sahyog aur samarthan se hum aise dushman se shanti se jeet rahe hai jise hum dekh nahi sakte. Suva ko dhanyewaad aur Nausori ko bhi dhanyewaad hai jinke sahyog se poore desh ke swaasth ki raksha huwi.

Hamare quarantine me jabki khatre waale contacts aa gaye hai, isi liye Suva aur Nausori me chaubees (24) ghante ka curfew hataya jaa sakta hai jo kal subha chaar baje (4am) hatane ki yojna hai lekin logon ko idhar-udhar jaane ka bahut kam mauka rahega. 

Suva aur Nausori me ek baar fir rokthaam waale do ilaake ho gaye hai. Viti Levu ke anye ilaakon ki tarah yahan bhi shaam che baje se subha chaar baje tak curfew laagu rahega.
Supermarkets khul sakte hai, Banks aur Pharmacies bhi khul sakte hai. Restaurants takeaway aur delivery ki sewa pradaan kar sakte hai. In kariyon ke liye paise bachaaye, jahan tak ho sake idhar-udhar naa ghume, apne ghar se bahar ke logon ke saath mel-jol bilkul na rakhe. Please apne ghar se bahar sirf ek vekti ko bheje. Apne bacchon ko ghar se bahar na le jaaye. Agar aap apne ghar se baahar jaate hai toh acchi tarah mask pahane, dusron se do metres tak doori rakhe. Yaad rakhe ki aapke phone me careFIJI app install ho tatha Bluetooth hamesha on rahe. Apna haath dhote rahe. Supermarket, bank ya pharmacy se lautne par seedhe apne ghar jaaye. Bina kisi karan ke ghar se bahar rahne ka koi bahana nahi chalega. Agar aapko bhojan ki zaroorat hai toh ise khareedne ke baad sidhe ghar jaaye. 

Rokthaam yaani containment ilaake se bahar aise business chal sakte hai jo khatre waale nahi hai lekin maalikon ko mask-pahanne, ek dusre se dur rahne aur customers tatha kaam karne waalon ko apne phone me careFIJI app install karna hoga aur Bluetooth hamesha on rakhna hoga. Yaad rahe ki khatre waale business me shaamil hai: Gyms, movie theatres, video gaming shops, cyber cafes, taverns, bars, billiard shops aur amusement arcades, ke alawa hairdressers, barber shops, spas, beauty therapy, massage therapy venues, saunas aur tattoo parlours. Yeh aise businesses hai jahan COVID suraksha protocols ka paalan nahi ho sakte kyonki inka operation karne me ek dusre se dooriya rakhna mushkil hai. Fiji bhar me yeh businesses bandh rahna chahiye.

Tracing karne se virus ko rokne ka aadha kaam poora huwa hai isi liye is prayaas ke liye hamari teame shabaashi ke hakdaar hai. Lekin Fiji CDC me haalhi mamla saamne aane ke baad hum pahle ke milaan me aur bhi tezi se tracing kar rahe hai. Abhi gyarah hazaar (11,000) se zyada swab results ko process nahi kiya gaya hai. Hum zyada khatre waale logon ke swab results ko priority de rahe hai. Jab tak hume aur jaankaari nahi mil jaati hamare paas gyarah hazaar karan hai ki kyon hum pratibandh yaani restrictions abhi nahi hata sakte. Hume abhi bahut saare tests karna baaki hai.

Jaisa maine kaha tha ki kal se humne 2500 se zyada tests kiye hai. Main abhi ki testing shamta ko sabhi ke samne rakhna chahta hoon. Pichle saal ke COVID-19 prakop ke chalte, humne poore April mahine mein 776 COVID-19 tests kiye the. Ek tarah se, 25 tests ek din mein. Lekin iss prakop se pehle, har din hum 250-300 tests kar rahe the. Aur fir saptahant yaani weekend me Fiji CDC ke temporary taor se band hone se pahle, ek din mein wahan 1785 samples tests hote the. Hamari abaadi ko dekhte huwe, hamari testing rate Australia aur New Zealand ke barabar ho gayi hai jo prati din 1 se 3 prati 1000 hai. Hum aur bhi zyada tests karne ki yojna bana rahe hai.
 
Kal hume 28 nayi GeneXpert ki machine mili hai jo desh bhar me pahucha di gayi hai. Yeh mante huwe ki yeh chaubiso ghante (24/7) hoga, isse ek din me hamari tests karne ki shamta badhkar 3000 tests ho jayegi. Jab tak hum yeh haasil nahi kar lete hum isi Thursday ko kuch swabs ko Australia ki ek private lab me tests karne ke liye bhejenge tatha results hamein saptahant tak milne ki umeed hai. Hum iss samarthan ke liye Australia ki sarkaar ke abhaari hain.

Jabki uss data par hamara agla kadam taye kiya jayega, toh aise me Ministry of Commerce, Trade, Tourism and Transport ne ek system ko announce kiya hai jahan COVID- surakshit sanchalan ke tahat passes ke duara businesses ko fir se kholne ki  anumati di jaa sakti hai. Inn passes ko haasil karne ke liye digital portal par kaam kiya jaa raha hai. MCTTT agle doh dino mein ispar aur jaankaari announce karega ki kaise businesses aur employers apply kar sakte hain taaki weh apna operation ucchit suraksha upayo ke saath kar sakte hai.  

Hum ummeed karte hain ki employers aur businesses acchi tarah soch vichaar karke COVID-suraksha sanchalan yojna banayenge. Hum chahte hai ki aap fir se apna business khole, hum chahte hai ki aap logo ko naukri de, kyunki iss mahamari se samajik aur aarthik bojh ko kam karne ke liye hamein aapki poori takat ki zaroorat hai. Lekin yeh acchi tarah manage karne ke tarike se hona chahiye. Main nahi chahta ki businesses ek temporary vichaar ke saath ise shuru kare. ‘Normal’ ka abh naya matlab ho gaya hai. Puri duniya ne Coronavirus ke iss jokhim ko apnaya hai tatha hume bhi aisa karna chahiye, hum bhi kar sakte hain. Main yeh wada nahi kar sakta ki hamare tests ke results ke baad sabhi ko apna business kholne ka mauka milega lekin hume kam se kam COVID-safe business plan aage laana chahiye taaki zimedaari ke saath aap apna sanchaalan kar sake.

Fiji, hum ek naye charan yaani phase me jaa rahe hain. Ek naya normal jo poori dunia ne apnaya hai  aur hume bhi ise poori tarah apnana hai. Hamein saodhaani se kadam uthana hai. Hamein satark rehna hai. Hamein unn upayo ko banae rakhna hai joh hume surakshit rakh sakte hai. Aur hamein ek samaj ki tarah rokthaam yaani containment ka bhaar apne upar lena chahiye. Naaki upar se niche, balki aam logon se, jahan aam Fijiwasi ek saath faisla lete hai jo ki aur bhi surakshit aur poshan karne ka raasta ho.

Hum dono-mobile teams aur stationary clinics ke duara lagataar samaaj par apni nigrani rakhne ki yojna badhaa rahe hai. Fiji me samaaj ke duara faile cases ho sakte hai jiska matlab hai ki samaaj mein screening aur testing karna naazuk sthar (critical level) par hai. Agar naye cases saamne aaye aur baad me aur bhi sakt niyam laagu kiye gaye toh samaaj par apni nigrani badhane se yeh niyam acchi tarah target par honge. Iske alawa hamari testing ki chamta bhi badhti rahegi jisse hum kam samay me zyada tests karenge.

Aaj tees (30) din poore ho gaye jab is saal hamara pehla local COVID-19 case samne aaya tha. Pichle saal hume poora ek mahina laga tha, COVID-19 ke prakop ko rokne ke liye. Main aapko abhi bata raha hoon ki -  yeh prakop anye kisi bhi prakop se zyada gambheer hai jiska samna humne pehle nahi kiya hai. Yeh ladaai tees (30) din ki nahi hai. Yeh prakop aur jaldi failta hai. Inke clusters bahut bade aur dur tak faile hain. Aur main dukh ke saath aapse kah raha hoon ki aaj aakhri din nahi hai jab main naye cases announce kar raha hoon. Humne bhale hi hazaro contacts ka pata kiya hai lekin hume tests karke pata karne me kai din lagenge ki kitne log positive huwe hai aur iske jawab me hume kya niyam laagu karne honge. Lekin tabtak aap apne ghar par rahe, jab tak ki aapko bhojan, dawai ya koi zaroori samaan khareedne ke liye bahar jaane ki zaroorat na ho. Baahar khatra hai, please zimmedaar hokar kadam utaaye. Sirf isliye saodhaani na barte kyonki humne aapko aisa karne ke liye kaha hai, balki aisa karen kyonki aapki aur aapke chahne waalon ki jaan ka sawaal hai.   

Dhanyawaad.