HINDI - STATEMENT BY THE PERMANENT SECRETARY FOR HEALTH & MEDICAL SERVICES DR. JAMES FONG - 19.05.21

Hum un Fijiwaasiyon ke abhaari hai jo ghar ke andar hai aur apne pariwaar se bahar dusre logon ke saath mel-jol nahi rakh rahe hai, jald lakshan yaani symptom ki report kar rahe hai tatha COVID marizon ke saath contact hone ki jaankaari dene ke alawa careFIJI app ka istemaal kar rahe hai. Yeh sabhi kadam virus ko kaboo me karne me hamari madad karega. Hum un vyapaariyon yaani business houses tatha unke maalikon ke abhaari hai jo sarkaar ke saath milkar kaam kar rahe hai taaki COVID suraksha aur sakt niyamo ko laagu kiya jaaye. Vyapaar karne waale yaani businesses kis tarah COVID suraksha protocol aur niyamo ke neeche approval lekar operate kar sakte hai yeh Fijian Government Facebook par hai. Aap aur jaankaari ke liye covidbizpass@mcttt.gov.fj par email bhi kar sakte hai.

Virus failne par nayi jaankaari (Transmission Update)
2974 aur tests karne ke baad COVID-19 ke gyarah (11) naye cases hamare saamne aaye hai. Pahle che (6) cases Vunimono/Nadali ke anye cases se linked hai jo apne ghar ke andar isolation me the. Baaki paanch (5) cases, ek anye case ke pariwaar waale hai.Unhe Nausori me ek quarantine facility me rakha gaya tha aur wahan jaane par jab unka swabs liya gaya tha toh us waqt unka test negative tha lekin quarantine me dusri baar swab karne par unka test positive aaya hai.

Teen mariz jinhe pahle virus ke liye positive paaya gaya tha woh ab bilkul theek ho gaye hai jiska matlab hai ki abhi Fiji me COVID-19 ke 57 active cases hai jo apne ghar par isolation me ya quarantine facilities me hai.

Tike ki jaankaari (Vaccine Update)
COVAX ke duara hume aur tike yaani vaccines mile hai aur hume is saptah baad me Australia se aur deliveries milegi. Agle saptah ke anth tak hamare paas lagbhag 86,000 doses ho jaayenge aur agle saptah tak hum agle round ke teeke lagana yaani vaccination karna shuru karenge. Hamari priority rahegi ki hum sabse pahle apne baaki ke frontline workers jinme shaamil hai woh log jo naukri karte waqt janta se zyada milte julte hai jaise ki taxi aur bus drivers, jo supermarket me kaam karte hai, jo Fijiwaasi bheed waale ilaake me rahte hai, zyada umr ke kaaran kamzor log tatha kuch puraani bimaari se pidit log. Iske baad un logon ko teeke lagaye jaayenge jinhe pahla dose mil chuka hai. 

Is yojna me shaamil hai mobile units ke zariye teeke (vaccines) Fijiwaasiyon tak pahuchana. Yeh is baat ka dhyaan rakhega ki Fijiwaasiyon ko teeke lagane ke liye dur jaana na pade ya lambi line me khada na hona pade. Aam janta ki suvidha ke liye, hum drive-through vaccination sites bhi rakhenge. Agle saptah announce kiya jayega ki mobile vaccination teams kahan-kahan rahegi.