HINDI - STATEMENT BY THE PERMANENT SECRETARY FOR HEALTH & MEDICAL SERVICES DR. JAMES FONG - 30.04.21

Namaste.

Kal 16,613 Fijiwaasiyon ki screening karne ke tatha 1018  tests karne ke baad hum COVID-19 ke ek mamle ki report kar rahe hai. Main is mariz ke baare me kuch der baad jaankaari doonga.

Lekin isse pahle hume apne roktham ke niyam me kuch badlao karne ki zaroorat hai.

Hamare case number 113 jo ki ek garment factory me kaam karti hai ke sambandh me hamari contact tracing lagataar kaam kar rahi hai. Hum do factories par gaor kar rahe hai. Ek hai Lyndurst  factory jahan yeh mahila kaam kar rahi thi jabki dusri hai Mark One Apparel factory hai.

In dono factory me kaam kar rahe log, company duara di gayi transport se hi kaam par aate jaate hai isi liye in dono factories me virus failne ki sambhaona bahut zyada hai.

Kal raat bhar se, hamari teame in khatre me pade in karamchaariyon ki lagataar contact tracing kar rahi hai. Subha hone se pahle samples processing ke liye bheje gaye. Hume 877 karamchariyon tak pahuchna hai. 321 karamchaariyon ki pahchaan ho gayi hai, screen tatha parichan ho gaye hai. Hume abhi tak inme se koi positive mamla nahi mila hai. 

Agar aap Lyndhurst ya Mark One Apparel factory me kaam karte hai aur abhi tak aapse hamari teamo ne contact nahi kiya hai to kripiya 158 par call kare taaki hum jitna jaldi ho sake aaptak pahuch sake.

Hume 500 se zyada karamchaariyon se sampark karna hai. Inme se kai log Suva-Nausori ke beech rahte hai. Hum inki talaash karne me ek minute ki bhi deri nahi karna chahte hai. In logon ki khoj karne me hamari teamo ki madad karne ke liye hum Suva aur Nausori ke Containment yaani rokthaam waale ilaake ko aaj raat aat baje se somwaar ki subha chaar baje tak lock down kar rahe hai. Rokthaam waali do borders yaani seemaon ke badle Suva-Nausori Lockdown Zone ko ek kar diya gaya hai.

Police Logani village, Sawani tatha Tamavua-i-wai bridge (Delainavesi) me checkpoints bitaayegi. Rups Big Bear 8 Miles bridge waale checkpoint ko hata diya jaayega.

Suva-Nausori ke beech rahne waalon ne pahle yeh dekha hai -- unhe iska matlab pata hai. Suva-Nausori Lockdown ilaake me curfew lagbhag 56 ghanton tak rahega. Kisi ko apne ghar se nikalna nahi chahiye. Main fir se kah raha hoon, lockdown ilaake me koi bhi, mata-pita ho, ghar me akele kamane waala ho, koi bhi bacha, kisi ko bhi ghar se nahi nikalna hai. Police ghumne firne waale pratibandh ko laagu karegi. Mantralay ki swikriti ke bina aap sirf apne ghar tabhi nikal sakte hai jab koi bahut bimaar hoga aur inme kidney dialysis mariz shaamil hai.

Is lockdown ke samay koi bhi business ho jinme supermarket, bank ya pharmacies bhi shaamil hai ko business band karna hoga. Kuch zaroori sewaen jaise paani, bijli, ports aur private asptaal Mantralay ki swikriti ke baad apna sanchaalan kar sakte hai tatha hum in vevasthaon ko lekar sewa pradaan karne waalon ke saath milkar kaam kar rahe hai. In lockdown ilaake ki seema ke andar ki delivery bhi rok di jayegi kyonki  koi bhi market ya supermarket khula nahi rahega to yeh delivery sewa, weekend me chalane ki zaroorat nahi hai. 

Jaisa main pichle kuch dino se kahta aa raha hoon, lockdown antim chara hai. Is samay humne faisla kiya ki Suva-Nausori ke beech ek snap lockdown behad zaroori hai. Lekin hum yeh jaante hai ki yeh pratiband agle 48 ghanto me zaroori sewaon ko haasil karne me mushkile khadi karega ya namumkin banayega. 

Humne kuch food packs order kiye hai jo lockdown ilaake me un Fijiwaasiyon ko deliver kiye jaayenge jinke bhojan khatm ho jaayenge. Agar aap lockdown waale ilaake me rahte hai aur aapko bhojan ki zaroorat hai to aap kal subha nau baje ke baad toll free number 161 par call kar sakte hai. Kripiya dhiraj rakhe aur aapke calls zaroor utaaya jaayega. Sab kuch asaan karne ke liye aapko dhyaan me rakhna hoga ki aapki saari jaankaariya aapke saath ho jaise, naam, pata, aur pariwaar me kitne log hai. Is weekend ke dauraan deliveries hogi, hum aapke paas aayenge, isi liye aapko ghar se nikalne ki zaroorat nahi hai.

Raviwaar ko acchi tarah dekhenge ki hamari contact tracing test hume kya batate hai aur hum fir tay karenge ki kya lockdown ko badhaya jayega ya nahi.

Ab main apne naye COVID mamle ke baare me batane jaa raha hoon. Yeh mariz case number 110 ki patni hai jise isi hafte pahle Ra me virus ke liye sabse pahle positive paaya gaya tha. Yaad rahe Ra me ek aur mamla hai case number 116 jiske baare me kal bataya gaya tha. Toh Ra me kul teen maamle ho gaye hai jisse do dal ban gaye hai.

Hume abhi tak nahi pata hai ki in logon ko yeh virus huwa kaise. Humne in positive results ke samples ko Melbourne me apne reference lab bheja hai taaki pata chal sake ki kya in cases me koi genetic sambandh hai.

Hum yeh bhi chanbin kar rahe hai ki kya yeh cases pahle announce huwe cases se huwe hai jahan quarantine ka palan nahi huwa tha. Main aapko batana chahta hoon ki yeh kaise huwa hoga.

Iss virus ko failne mein 14 din lagte hain, iska matlab yah hai ki jis samaye se koi vekti virus se pidit kisi anye vekti ke sampark mein aata hai woh bhi virus ki chapet me aata hai lekin virus ka chin yaani symptom saamne aane  ya COVID-19 ke liye positive hone me vekti ko 14 din lag sakte hai. Jab quarantine me 14 dino baad  COVID test karne par kisi ko negative paaya jata hai to hum jaan jaate hai ki is vekti ko COVID nahi hai. Lekin hum yeh baat is bal par kah rahe hai ki yeh vekti do hafte quarantine me bitane ke dauraan virus ki chapet me nahi aaya hoga. Lekin agar weh in 14 dino me virus se pidit kisi vekti ke contact me aaye honge to 14 dino ka period fir se shuru ho jayega.


Tanoa Hotel me border quarantine suvidha me kanoon todne ki wajah se virus se pidit kisi karamchaari ne yeh virus anye logon tak pahuchaya hoga jab weh 14 dino ke quarantine period me the. Iska matlab hai ki jab hume unke quarantine ke din khatm hone ke samay test kiya hoga to humne positive hone waale marizon ko miss kar diya hoga. Tanoa se jin logon ko 12th April ke baad chutti huwi un logon ko lekar yahi khatra hai. Inme se ek vekti case number 114 yeh baat saabit karta hai.

Humne 12th April ke baadTanoa Quarantine Facility se chutti huwe 96 me se 93 logon ko contact kar liya. In logon ko test kiya gaya hai tatha unka 14 dino ka quarantine dobara shuru kiya gaya hai. Inme se koi ek case Ra me virus ke prakop yaani outbreak ka karan raha hoga. Hum puri tarah nahi jaan paayenge jabtak yeh quarantine period jo dobara shuru huwa hai who khatm hoga.

Tab tak, hamare paas koi dusra raasta nahi hai ki Ra ke pahle do cases ko samaaj me faile cases kahe. Yeh woh cases hai jinka kisi se koi samband nahi hai na hi weh videsh se laute hai.

Kal humne contact tracing ilaako ka ek list online chaapa jabki hum sirf wahi ilaako ko abhi tak jaan paye hai. Fir bhi yeh pura list nahi hai. Ek baadi community transmission case ka Fiji mein hona jokhim ki baat hai jiske bare mein hamein abhi jaankaari nahi hai. 

Toh aap uss list ko pade aur na soche ki agar aap uss jagah par nahi gaye hai toh aapko COVID nahi hai. Aap ko fir bhi ho sakta hai. Agar aap apne ghar se kahin bhi gaye hai, toh aapko yeh virus ho sakta hai aur aap jab bhi apne ghar se bahar nikalte ho, aap apne aap ko jokhim mein dalte ho.

Viti Levu ke kuch ilaako ko rokthaam wale zones mein daal diya gaya hai. Ra waise bhi inn sankhiya wale ilaako se alag hai, lekin fir bhi logo ko idhar udhar jaane se rokne ke liye Fiji Police Force ne containment area tay kiye hai jinme  Dokonavatu-Nanukuloa-Naiserelagi ilaaka aur Naria ilaaka shamil hai.

Aaj raat aat baje se, Suva aur Nausori corridor mein curfew rahega. Hamare paas 56 ghante hai iss COVID ki sari chains ko failne se rokne ke liye. 

Mantraye ki team saath mein police aur sena iss samaye ka pura faida uthayege aur hamein iss virus ke failne aur aage badhne se rokne mein madad karenge.

Lockdown ke ilaako mein hamein koi bhi movement nahi chahiye. Koi bhi raaste par nahi dikhna chahiye, agar mantralay ne aapko pass diya hai aur aap chikitsa ya medical emergency karan se hi nikle hai, agar nahi toh yah ek apradh mana jayega aur Police aapko giraftaar kar sakti hai. 

Fiji ke anye ilaako ke liye sirf zaroori sewaen jaise supermarkets khuli hai lekin zaroori ho tabhi log bahar jaa sakte hai  tatha 11pm se 4am tak curfew abhi bhi lagoo rahega.

Hum sabhi se maang kar rahe hai ki aap ghar par hi rahe. Parivaar ke saath weekend bitaye, apne baccho ko saath rakhe. Jab bhi aap ghar se nikalte hai aap iss jaan lewa virus ko apne ghar laate hain. Kisi wajah se aapko ghar se nikalna pada toh mask ka istemaal kare aur careFIJI app download kare aur on rakhe. 

Agar shuruwaat se hi hum careFIJI App download karte toh aaj hum iss sthiti mein na hote.

Yadi hum anye jagho par sabhaao ya badi sankhiya mein logo ko ghumte huwe dekhenge toh hum iss lockdown ko anye ilaako mein laago karne se peeche nahi rahenge.

Iss kaam ko karne mein kuch mushkil nahi hai. Jo bhi niyam hum banate hain woh hamare desh ki suraksha ke liye hai. Jo meri team par lagoo hota hai woh  aap par bhi lagoo hota hai aur na chahne par bhi hamein isse manna padega. 

 Meri team isse ek ausar ke roop mein dekhti hai  - ausar jahan hum iss virus ko rok sakte hai.

Hamein aapke saath aur sahyog chahiye. Main yeh aapko vishwaas dilata hoon ki hum apne prayaso se iss prakop se Fiji ko mukt karenge. Ek saath hum kar sakte hain, ek saath humne kiya hai aur ek baar fir kar sakte hain.

Dhanyewaad.