HINDI - STATEMENT BY THE PERMANENT SECRETARY FOR HEALTH & MEDICAL SERVICES DR. JAMES FONG - 30.06.21

Namaskaar.

Aaj subha aat baje tak COVID-19 ke 274 naye mamle saamne aaye hai. Kal aur aaj ke beech 74 mariz theek huwe hai aur abh desh me 3503 active mamle hai. Ek positive mariz se contact me aane ke baad main ek baar fir quarantine orders ke neeche hoon isiliye main media ke sawalon ke jawaab zoom ke duara doonga.

Humne ek map ko Fijian Government Facebook page aur Ministry of Health and Medical Services ke website par rakha hai jo dikhata hai ki virus kin-kin ilaakon me hai tatha main sabhi se yeh map dekhne ki maang karta hoon. Jaisa ki aap online map me dekh sakte hai ki samaaj me virus failne ki stithi bani huwi hai jahan poore Central Division me mamle paaye gaye hai. Jaisa hum saptah bhar se kah rahe hai, mamle upar jaa rahe hai tatha hume lagta hai ki dainik average mamle aur upar jaa sakte jahan log COVID-19 ke gambheer mamle ka saamna kar sakte hai.

Ek nayi jagah Rifile Range, Lautoka me virus paaya gaya hai jahan Lautoka ke alag-alag ilaake se chauda (14) se zyada log ek birthday party me hissa lene gaye the. Iss kadam se na kewal hamari suraksha niyamo ka ghor niradar huwa hai, balki chinta waali baat hai ki isse unn logon ke pariwaar, samaaj ke log tatha pariwaar aur samaaj me kamzor logon ko bewajah khatra ho sakta hai. Badi sankhya me ikkatta hone se aap apne Dada-Dadi ya chahne waale ko aakhri baar dekhenge kyonki jald failne wala yeh virus unhe aasaani se jald apni chapet me le sakta hai jisse unhe gambheer bimaari ho sakti hai aur unki jaan bhi jaa sakti hai. Yeh mat bhoole ki kewal aap ya aapka pariwaar hi iss parinaam ka saamna nahi karenge. Poore samaaj  ko abh sakt niyamo ke neeche rakhne ki zaroorat hai. Aur jab iss tarah gair kanooni taor se ikkatta hone waalon me se koi ek bimaar hota hai aur aspataal me bharti hota hai, toh doctors aur nurses ka kaam hai unka ilaaj karna aur hum aisa karenge. Lekin aise COVID-19 mamle jo bachaaye jaa sakte the, ka ilaaj karne se hamare swaasth pranaali par bojh padta hai aur anye logon ka ilaaj karne me mushikile hoti hai.  

Isiliye main sabse zyada khatre me aur front lines me kaam karne waali hamari team ki orr se aapse maang karta hoon ki aap hamare aadeshon ka paalan kare. Agar aapko apne rishtedaaron ki yaad aa rahi hai toh kripya apne chahne waalon se phone par baatein kare; birthday parties agle saal ho sakti hai.

Aaj hum do aur logo ki maut ki report de rahe hai. Is prakop ke dauraan, dukh ki baat hai ki hamari medical team ke duara ilaaj karne se pahle teen logon ki maut ho chuki thi.

Ek mariz ki maut ghar par huwi jabki doh anye logon ko aspataal pahuchne par mrit ghoshit kiya gaya. 

Iss virus par jald kaabu paana aur lakshan yaani symtoms saamne aane tatha kuch hi ghanton me kharaab stithi aana sambhao hai. Lekin kai baar dekha gaya hai ki kai din pahle lakshan nazar aate hai tab jaakar logon ko gambheer bimaari hoti hai. Isi liye main aam janta se maang karta hoon ki agar aapko ya jise aap jaante ho use sardi zukhaam jaise lakshan nazar aate hai toh kripya abhi apni nazdeeki screening clinic jaaye. Agar aapko sardi, khaansi, bahut thakaan lag rahi hai, agar aapko swaad nahi aa raha hai ya koi mahak nahi lag rahi hai ya aapko shak hai ki aapko shayad COVID-19 hai toh jald se jald apni nazdeeki screening clinic jaaye. Samay sankat se bhara hai aur aap ek bhi second barbaad nahi kar sakte jisse virus anye logon tak pahuche aur aapko iska jald ilaaj na mile. Jin doctors ki aguwaai main kar raha hoon ko aapki dekhbhaal karne ki training mili hai. Kripya hume yeh mauka de.

Hamesha se hamara dhyaan, gambheer bimaari aur jaan bachane par raha hai. Abh jabki prakop me badlao huwa hai toh aise me uska saamna karne ki yukti me bhi badlao huwa lekin hamara mission wahi hai. Hamara sabse zaroori kaam hai, unn logon ki jaan bachana jo bahut bimaar hai, aspataal me bharti hone ya jinki jaan khatre me hai,

Koi bhi COVID-19 ke gambheer stithi ka saamna kar sakta hai lekin kuch logon par zyada khatra hai joh saat (60) saal se zyada hai, jinhe pahle se koi gambheer bimaari hai jaise ki hypertension, diabetes, heart ya lung disease, chronic kidney disease, cancer ya wohh log joh bahut mote hai ya jinka wajan bahut zyada hai.

Isi liye jab hum aam janta se maang karte hai ki weh COVID-19 ke khatre waale sanket ko lekar chaukanna rahe, toh hum aapse kamzor Fijiwaasiyon par khaas nigrani rakhne aur unki dekhbhaal karne ki maang karte hai. Hamari nazar me Ministry me hum aisa hi karenge. Hamara mukh kaam hai is gambheer bimaari aur maut ko rokna jiska matlab hai ki jitni jald ho sake, sabse kamzor marizon tak pahuchna. 

COVID-19 ke kai marizon ko pahle halke se lakshan honge fir weh poori tarah theek ho jaayenge. Abhi 2000 se zyada Fijiwaasi isolation me ya quarantine suvidha me hai, jabki 1000 se zyada log apne ghar par hi isolation me hai aur hume umeed hai ki inme se zyada log poori tarah theek ho jaayenge. Lekin agle kuch saptah me jaise mamle ki sankhya badhegi, hamare isolation ki suvidha ki parikcha li jaayegi. Jabtak aisa hota hai hume dhyaan me rakhna hoga ki hum unn kamzor logon ki pahchaan karke unka ilaaj kare joh COVID-19 ki sabse gambheer stithi me jaa sakte hai.

Isi liye aage chalkar, hamari isolation suvidha unhi marizon ke liye hogi joh virus ke kaaran bahut bimaar hone ya jinpar jaan gawane ka khatra ho sakta hai. Apne kamzor logon ko in facilities me rakhne se hum unka ilaaj aur unpar nazar rakh sakenge agar kisi mariz ne COVID-19 ki wajah se khatre ka sanket dikhaya. Anye marizon se maang ki jaayegi ki weh apne ghar par hi apne aapko surakshit isolate kar le jahan unhe ghar par dekhbhaal ke kaayde aur sansadhan diye jaayenge. 

Joh log apne ghar par isolation me honge, hamare paas marizon ka naam aur contact ki jaankaari ki list hogi taaki hum har din phone ke duara inn logon ke swaasth aur anye zaroorton ka pata lagate rahe. Jaisa hota aaya hai, unn logon ko khaane-peene aur anye gharelu samaan pradaan kiye jaayenge taaki yeh log apne ghar me surakchit rah sake.

Unhe apne lakshan par har din nazar rakhne ko kaha jaayega aur agar unhe khatre ke koi sanket mile toh unhe jald se jald ilaaj ke liye kisi nazdeeki aspataal lejaya jaayega. Agar weh khud nahi jaa sakte toh weh ek naye number 165 par call kar sakte hai, joh ek emergency retrieval team ko call karke aapko ek COVID-care centre pahucha sakte hai.

Yeh team ANZ Arena par hai jo isolation suvidha se COVID-care centres tak gambheer marizon ko pahuchaane ka kaam karegi. Hamari pratikriya ke iss charan ki zaroorat hai ki hum apne logon ko field se Ministry ke office me khiskaaye taaki weh door se bimaar vekti ko dekh sake. Isse hume mauka milega ki hum aur bhi zyada marizon ko dekhe taaki koi gambheer bimaari ke baare me aur jald se jaankaari mile.

Humne apne internal staffing ko FNU ke final year medical aur dental students se badla hai aur hum bahut abhaari hai ki yeh yuwa log Fiji ki sewa karne ke liye aage badhe hai.

Hum National Gymnasium me ek intermediate COVID-care facility ki sthapna kar rahe hai jahan unn marizon ke liye kam se kam pachaas (50) khaat rakhe jaayenge jinhe virus ke gambheer lakshan dikhaayi denge. Humne ilaake me aur jagah ki pahchaan ki hai taaki centre ko aur badhaya jaaye agar zaroorat padi.

Hum logon se maang kar rahe hai ki weh screening clinics par jaaye agar unko koi lakshan dikhaaye de –– yeh sabse tez tarika hai aapko swab, assess aur zaroori hone par isolation me karne ke liye.

Humne pahle yeh announce kiya tha jahan COVID-suraksha niyam ka paalan karte huwe Fijiwaasi Viti Levu se Vanua Levu ya islands jana chahte hai. Kuch log quarantine me hai jo sab kuch saaf hone ke baad apne ghar lautne ka intzaar kar rahe hai. Lekin, hum iss program me nayi arzi ko swikaar nahi kar rahe hai jab tak quarantine me nayi jagah uplapdh nahi ho jaati. Hume in rooms ko COVID-positive marizon ke liye rakhna hai joki Viti Levu par hamare rokthaam programme ka hissa hai.

Bhaiyo aur bahano, jaisa maine pahle kaha, yeh virus lahron yaani waves me aate hai. Hume lagta hai ki agli lahar ya wave aaj se chaar se paanch dino me aayegi jo ki abtak ki sabse gambheer lahar ho sakti hai. Jabki sanket mil rahe hai ki aane waale saptah me aur bhi jaane jaa sakti hai lekin vighyaan yaani science aur anye deshon ke anubhav hume bata rahe hai ki hazaron zindagi bachaai jaa sakti hai.

Vigyaan yaani science humare peeche hai jo hume bata raha hai ki virus ko failne ki gati me kami laane ke liye hume masks pahanna chahiye, dusron se dooriya rakhni chahiye aur haath dhote rahna chahiye. Iss vigyaan ke peeche sui yaani vaccination hume batate hai ki yeh iss prakop ke khilaaf suraksha ka kaam karta hai. Sui ke duara Fijiwaasiyon ko suraksha pradaan karne ki hamari pragati dikhaati hai ki hum waapas samanye zindagi ki orr lautne waale raaste par acchi tarah chal rahe hai.

Sui lagane waali team isi Somwaar se acchi tarah kaam kar rahi hai. Abhi tak, hamari lakchit target ke pachaas (50%) logon yaani Fiji ke aadhe yogye logon ko kam se kam COVID-19 sui ki ek dose lagi hai.Hum us rate par logon ko sui laga rahe hai jo kuch ameer deshon se bhi aage hai. Lekin hamara mission abhi poora nahi huwa hai. Hamara laksh hai Fiji ke sabhi yogya bade logon ke liye sui uplapdh karna aur sabhi Fijians ko iss surakchit aur asarkaarak sui ko swikaar karne ki maang karna.

Main sach me hairaan hoon ki kuch log is sui ko lene se mana kar rahe hai jabki hum sabhi jaante hai ki kai sadiyon se sui kai khatarnaak bimaariyon ko failne se rokne me kaamyaab rahi hai. Yeh ek nayi sui hai kyonki yeh ek nayi bimaari se yudh kar rahi hai. 

Har ek nayi sui ki tarah iss sui ko bhi test kiya gaya aur paaya gaya ki yeh surakchit hai.

Beete saal me humne desh me measles aur Men-C ke khilaaf sui ke safal abhiyaan kiye the. Sandeh paida karne waali ek na ek awaaz rahegi, kuch logon ka apna vishwaas hai. Lekin main aapko batata hoon joh mera vishwaas. Main jabki Ishwar me manta hoon toh mera aur mere doctors jinki main aguwaai karta hoon vishwaas karte hai ki Ishwar ne unko jaan bachane ke maqsad se bheja hai. Mera manna hai ki Ishwar ne hume is kaabil banaya hai ki hum bimaari ka ilaaj karen aur iss sui ko dunia bhar me medical, scientific aur dhaarmik taor par maanyeta prapt hai. Yeh sui deshon ki madat kar rahi hai ki weh dunia ke anye deshon ke liye apni sarhade khole aur yeh hume bhi aisa karne me madat karegi. Joh log sui lagwane se inkaar kar rahe hai wohh apni aur dusron ki jaan ko khatre me daal rahe hai. Main isse saaf tarike se nahi kah sakta hoon. Aur main unn dharmik sansthaon ke netaon ko dhanyewaad dena chahta hoon jinhone sui lagwaai hai aur dusron ko sui lagwane ke liye kah rahe hai.

Aage dekha jaaye toh hum logon ko shikshit kar rahe hai ki weh kaise apne aap ko COVID-19 se bacha sakte hai aur inn niyamo ko jahan tak ho sake sakti se laagu kare. 

Hum logon se maang kar rahe hai ki weh screening clinics jaaye agar unhe COVID ke koi bhi lakshan ya symptoms nazar aaye. Jin ilaakon me bhaari sankhya me virus faila hai ya jahan hume lagta hai ki fail sakta hai, wahan par hum rokthaam ke kariyekram laagu kar rahe hai aur hum wahan par khaane peene ka samaan, zaroori gharelu samaan, masks aur virus ko samaaj me rokne ke liye jaankaari dena jaari rakhenge. Aur hum Fiji me har ek yogya Fijiwaasi ko sui lagana chahte hai taaki hum ek COVID-surakchit Fiji ki taraf kadam badha sake.

Agar aap ghar par soch rahe hai ki aap hamari, apne pariwaar ki, apne padosi aur desh ki madat kaise kar sakte hai, toh sabse acchi cheez joh aap kar sakte hai wohh hai ki aap jahan par hai wahin rahe, aur jahan tak ho sake apna samay surakchit apne ghar par bitaaye. Aapne pahle bhi mujhe yeh kahte suna hoga ki agar aapko ghar se nikalna zaroori hai toh apna mask pahene, dusron se doh metres tak doori rakhe, apna haath dhote rahe, apne mobile phone par careFIJI app install kare aur bluetooth switched on rakhe, aur apna kaam khatm karke seedhe ghar jaaye. Aur jaise aapko mauka milen sui lagwa le agar aapne abhi tak aisa nahi kiya hai. Logon ko ek ek sui, ek ek dose lagakar hum is prakop ko hara rahe hai. Isi liye bharosa rakhe, hum zaroor safal honge. Aur hum saath safal honge.

Dhanyewaad.