ITAUKEI - COVID-19 UPDATE FROM THE MINISTRY OF HEALTH & MEDICAL SERVICES - 25.07.21

iRogo ni Veidewavi ni Mate
E 626 na kisi vou vakadeitaki ena loma ni 24 na aua me yacova na 8 ena mataka nikua. E 79 na kisi mai na Yasayasa vakara, na kena vo mai na iwasewase e loma. Na matailalai ni tukutuku ni vanua e ririkotaki vakalevu ena taba ena bogi nikua ena vatavata ni Tabacakacaka ni Bula kei na iVolamata ni Matanitu (Fijian Government Facebook page). Ena rawa tale ga ni o raica ena vatavata ni COVID ni Tabacakacaka ni Bula ena http://bit.ly/3vE2ZBb, na vanua era tiko kina na veikisi vou.

E 9 na lewenivanua era leqa ena COVID-19 mai na ika21 ina ika25 ni Jiulai.

Na imatai ni leqa ena COVID-19 e dua na marama tikobibi yabaki 44 e Suva. A lai laurai e valenibula ena ika16 ni Jiulai 2021 ni taqa na nona icegu ka mosi tale ga na sarisarina. Ratou a cicivi koya na timi ni veiqaravi vakavuniwai ena Valenibulalevu e Suva. Ratou a vakadikevi koya na Vuniwai ka ratou seleti koya me vakasucumi vakavinaka na luvena ena ika18 ni Jiulai, 2021. E ka ni rarawa ni a bibi vua na mate ka leqa ena ika21 ni Jiulai 2021 ni oti e 5 na siga nona curu. Sebera ni cula na marama qo.

Na ikarua ni leqa ena COVID-19 e dua na turaga yabaki 72 e Muanikoso, a leqa ga e vale ena ika23 ni Jiulai 2021. Sebera ni cula na turaga qo.

Na ikatolu ni leqa ena COVID-19 e dua na turaga yabaki 50 e Suva, a leqa ga e vale ena ika25 ni Jiulai 2021. A cula ena imatai ni cula ena mua ni vula o Me. Sebera ni cula ena ika2 ni cula. Kena ibalebale ni sega ni taucoko na nona taqomaki.

Na ikava ni leqa ena COVID-19 e dua na marama yabaki 61 e Tacirua. A lai laurai e valenibula ni a taqa vakasivia na nona icegu. Ratou a cicivaki koya na timi ni veiqaravi ni vuniwai ena Valenibulalevu e Suva. A bibi vua na mate mani leqa ena ika24 ni Jiulai 2021 ni oti e 11 na siga na nona curu. Ratou vakaraitaka na leweni nona vuvale ni sa macawa 1 na nona vuvu, katakata, taqa na nona icegu ka sega ni viakana ni bera ni leqa. Sebera ni cula na marama qo.
 
Na ikalima ni leqa ena COVID-19 e dua na turaga yabaki 62 e Suva, a leqa ga e vale ena ika24 ni Jiulai 2021. Sebera ni cula na turaga qo.

Na ikaono ni leqa ena COVID-19 e dua na marama yabaki 60 e Vatuwaqa, a leqa ga e vale ena ika24 ni Jiulai 2021. Sebera ni cula na marama qo.

Na ikavitu ni leqa ena COVID-19 e dua na turaga yabaki 75 e Nausori. A lai laurai e valenibula ni a taqa sivia na nona icegu. Lai bibi vua na mate e valenibula ka leqa ena siga vata ga oya na ika24 ni Jiulai 2021. Sebera ni cula na turaga qo.

Na ikawalu ni leqa ena COVID-19 e dua na turaga yabaki 74 e Nasova a leqa ga e vale ena ika24 ni Jiulai 2021. Sebera na cula na turaga qo.

Na ikaciwa ni leqa ena COVID-19 e dua na turaga yabaki 53 e Naitasiri, a leqa ga e vale ena ika23 ni Jiulai 2021. Sebera ni cula na turaga qo.

E 7 tale ga era sa leqa ka sa vakadeitaki vei ira na COVID-19. Ia, e sa vakadeitaki vakavuniwai ni sega ni vuni leqa na COVID-19, era leqa ena mate bibi sa tiko rawa vei ira.

Sa 186 taucoko na leqa mai na COVID-19 e Viti, e 184 era sa leqa me tekivu mai na Evereli ni yabaki qo. E 94 tale ga sa leqa ena mate bibi sa tauvi ira rawa tiko; qo era sega ni okati mera leqa ena COVID-19.

E 242 era sa bula me yacova mai na irogo sa oti, kena ibalebale sa 16,931 na kisi vakadeitaki. Sa 23,069 taucoko na levu ni kisi me vakatekivu mai na Evereli ni 2021. Ena yabaki qo sa 21,207 na levu taucoko ni kisi ena Wasewase e loma, 1,845 ena Yasayasa vakara, 12 ena Wasewase na Tokalau kei na Wasewase na Vualiku e 5 na kisi (qo o ira na lesu yani e Viti Levu ka ra sa koritinitaki tiko). E sa 23,139 na levu taucoko ni kisi ena noda vanua me vakatekivu mai na Maji ni 2020, ka 5,928 era sa bula.

iRogo ni Vakadidike Vakavuniwai
E 3,087 taucoko na lewenivanua era vakadikevi ka 422 e tauri na nodra sabolo ena veivanua ni vakadidike vakavuniwai tudei, ena loma ni 24 na aua sa oti. Sa 358,035 taucoko era sa dikevi vakavuniwai ka 66,028 sa tauri na nodra sabolo me yacova mai nikua. Ena vanua ni vakadidike veitosoyaki, sa 2,575 sa vakadidiketaki vakavuniwai ena loma ni 24 na aua sa oti, ka 302 na sabolo e tauri. Sa 741,611 taucoko na levu ni lewenivanua era sa vakadidiketaki vakavuniwai me yacova mai nikua, ka 65,752 sa tauri na nodra sabolo.

iRogo ni Vakadidiketaki ni Sabolo
E 250,850 taucoko na levu ni sabolo sa vakadidiketaki rawa me tekivu mai na Evereli ni 2021 ka 293,711 na levu kece ni sabolo sa vakadikevi rawa me tekivu mai ena Maji ni 2020. Sa 3,004 taucoko na sabolo vakadidiketaki a ripotetaki ena ika23 ni Jiulai. Mai na iwiliwili sa tiko rawa, ni vakatautauvatataki ena 7 na siga e rauta ni 3,641 na sabolo e vakadidiketaki ena dua na siga se 4.1 mai na 1,000 na lewenivanua. Ni vakatautauvatataki ena 7 na siga e rauta ni 23.8 na pasede ni kisi vakadeitaki.
 
iRogo ni veicula
Me yacova mai na ika24 ni Jiulai, sa 440,361 na lewenivanua era sa cula ena imatai ni cula ka 96,357 ena ikarua ni cula. E kena ibalebale ni sa 75.1 na pasede ni lewenivanua e gadrevi era sa cula ena imatai ni cula ka 16.4 na pasede era sa cula ena ikarua ni cula.

Ni raica ena vatavata ni veicula ni Tabacakacaka ni Bula na iwiliwili ni lewenivanua era sa cula vakadua kei ira sa cula vakarua ena noda vanua, vaka kina na veiwasewase lelevu (divisional) kei na veiwasewase lalai (sub-divisional). Ena rawa ni o raica na vatavata qo ena http://bit.ly/3h2JfCZ.

Veika me baleta na matetaka
Ni vakatautauvataki ena 7 na siga, sa 804 na kisi vou ena 1 na siga se 908 na kisi mai na 1 na milioni na lewenivanua ena 1 na siga. Me da kua ni wele ena lutu ni wiliwili ni kisi enanoa kei nikua – na iwiliwili ni kisi na veisiga e veiveisau tiko. E levu na vuna, qo e wili tale ga kina na vanua e vakadidiketaki tiko mai kina na sabolo. Taura mada, na iwiliwili ni sabolo mai na Yasayasa vakara ena qaravi e liu baleta ni se bera ni tete vakaiyauyau kina na mate. E vakatotolotaki na kilai ni kena macala me vukea na nodra vaqarai na kisi vakadeitaki, isema ni veitaratara ka me tarova na kena dewa. E veivuke vakalevu na kena yadravi na kisi vakadeitaki ena 7 na siga me rawa ni kilai kina na iyaloyalo ni kena veidewavi na mate.

iVakasala raraba
Vei kemuni ni vakila tiko na ivakatakilakila ni COVID-19 e Suva – Nausori: 
Na lewenivanua era vakila na ivakatakilakila ni mate era na sega ni vakadikevi tale ena vuku ni COVID-19. E dodonu mo ni tiko e vale ka vakatikitikitaki kemuni me 14 na siga. E levu na tauvi COVID-19 ena sega sara ni bibi vei ira na ivakatakilakila ni mate. Era na vakila ga na vuvu, savuniucu, mosinitilotilo, katakata, sega ni vakila na ikanakana ni kakana ka sega ni boica rawa e dua na ka, momosiniyago kei na mosiniulu. E rawa nira bula nira qaravi ga e vale. Vei kemuni na vakila tiko na ivakatakilakila ni COVID ka sega ni ririkotaki vakalevu, kerekere mo ni vakatikitikitaki kemuni e vale me 14 na siga. Mo vakatikitikitaki iko mai vei ira na lewenivuvale ka mo yadrava tiko na ivakatakilakila bibi ni mate. Kevaka ni vakila ni sa bibi na ivakatakilakila ni COVID-19 me vaka na taqanicegu se mosinisarisari, kerekere ni gole vakatotolo ena dua na vanua e qaravi vakatabakidua kina na tauvi COVID-19:

- Valenibulalevu e Suva
- Valenibula veivuke (FEMAT) ena Vodafone Arena

Na lewenivanua e Nausori sa bibi vei ira na ivakatakilakila ni COVID-19 me gole ina:

- Valeniwai e Nausori
- Valenibula e Wainibokasi

Qirita na 165 kevaka o sega ni rawa ni lako ina dua na vanua ni veiqaravi vakavuniwai.

Ke o iko se dua o qarava tiko e sa tauvimate bibi ena COVID – vakabibi vei ira na yabaki 50 se sivia, ira na tauvimate bibi me vaka na matenisuka, mateniuto, mateniyatevuso, ceguoca, levulevu sivia, se bukete – mo veitaratara se gole ena dua na vanua ni vakadidike vakavuniwai. Kevaka e sa vakadeitaki vei kemuni na mate, eratou na qaravi kemuni na neitou dauniveiqaravi.

1)    Vei kemuni na tamata cakacaka ni sa tauvimate ka gadreva na livi mai na vanua ni cakacaka, ni sa kerei mo ni lai dikevi ena dua na vanua ni vakadidike vakavuniwai me vakarautaki e dua na ivola ni veivakadonui ni o sa na vakatikitikitaki e vale me 14 na siga.

2)    Vei kemuni na tamata cakacaka ni sa tauvimate, e rawa ni o kauta mai e dua na ivakadinadina vakavuniwai ni vakatikitikitaki e vale me 14 na siga vua e dua na vuniwai.

Vinaka.