iRogo ni Veidewavi ni Mate
E 264 na kisi vou vakadeitaki ena loma ni 24 na aua sa oti me yacova na 8 ena mataka nikua. E 131 na kisi mai na Yasayasavakara ka 133 na kisi ena iWasewase e Loma. Na matailalai ni tukutuku ni vanua e ririkotaki vakalevu ena taba ena bogi nikua ena vatavata ni Tabacakacaka ni Bula kei na iVolamata ni Matanitu (Fijian Government Facebook page). Ena rawa tale ga ni o raica ena vatavata ni COVID ni Tabacakacaka ni Bula ena
http://bit.ly/3vE2ZBb, na vanua era tiko kina na veikisi vou, na kisi vakadeitaki kei na kisi era sa bula mai na matetaka.
E 257 na kisi vou era sa bula mai na matetaka, qo mai na iotioti ni tukutuku a kacivaki, kena ibalebale ni sa 24,414 na kisi vakadeitaki. E 18,948 na kisi vakadeitaki ena iWasewase e Loma ka 5,446 ena Yasayasavakara. Na kisi taucoko mai na iWasewase na Vualiku kei na Tokalau (kisi e dewa mai Viti Levu) sa ra bula ka sa sega na kisi vakadeitaki ena iWasewase e rua qori.
Sa 37,776 na kisi ena gauna a tekivu veidewavi kina na matetaka ena Evereli ni 2021. E dua na iwiliwili vou eda sa yacova oya e 37,846 na kisi e Viti me tekivu mai na vula o Maji ni 2020, sa bula e 12,934.
Na lewenivanua era vakaleqai ena COVID-19
E 10 na lewenivanua era leqa ena COVID-19 mai na ika30 ni Jiulai ina ika10 ni Okosita. O ira na lewenivanua era leqa qo, era leqa taucoko ena iWasewase e Loma.
Na imatai ni leqa ena COVID-19 e dua na turaga yabaki 82 e Nausori a leqa ga e vale ena ika8 ni Okosita 2021. Sebera ni cula na turaga qo.
Na ikarua ni leqa ena COVID-19 e dua na marama yabaki 69 e Suva a leqa ga e vale ena ika7 ni Okosita 2021. Sebera ni cula na marama qo.
Na ikatolu ni leqa ena COVID-19 e dua na marama yabaki 64 e Wailea. A cula ena imatai ni cula ena muanivula o Me. Sebera ni cula ena ika2 ni cula. E kena ibalebale ni se sega ni taucoko na nona taqomaki.
Na ikava ni leqa ena COVID-19 e dua na turaga yabaki 64 e Suva a leqa e vale ena ika9 ni Okosita 2021. Sebera ni cula na turaga qo.
Na ikalima ni leqa ena COVID-19 e dua na turaga yabaki 47 e Kinoya, a leqa ga e vale ena ika9 ni Okosita 2021. Sebera ni cula na turaga qo.
Na ikaono ni leqa ena COVID-19 e dua na marama yabaki 44 e Lami. A laurai e Valenibulalevu e Suva ni a taqa sivia na nona icegu. A leqa na marama qo ni oti e 10 na siga na nona curu ena ika30 ni Jiulai, 2021. Sebera ni cula na marama qo.
Na ikavitu ni leqa ena COVID-19 e dua na turaga yabaki 72 e Kalabu. A laurai ena Valenibulalevu e Suva ni a taqa sivia na nona icegu. A leqa na turaga qo ni oti e 1 na siga na nona curu ena ika9 ni Okosita, 2021. A cula ena imatai ni cula ena itekivu ni vula o Jiune. Sebera ni cula ena ika2 ni cula. Kena ibalebale ni se sega ni taucoko na nona taqomaki.
Na ikawalu ni leqa ena COVID-19 e dua na marama yabaki 52 e Nabua. A laurai ena Valenibulalevu e Suva ni a taqa sivia na nona icegu. A leqa na marama qo ni oti e 12 na siga ni nona curu ena ika9 ni Okosita, 2021. Sebera ni cula na marama qo.
Na ikaciwa ni leqa ena COVID-19 e dua na turaga yabaki 63 e Lami. A laurai ena Valenibulalevu e Suva ni a taqa sivia na nona icegu. A leqa na turaga qo ni oti e 2 na siga ni nona curu ena ika9 ni Okosita, 2021. Sebera ni cula na turaga qo.
Na ikatini ni leqa ena COVID-19 e dua na marama yabaki 51 e Suva. A laurai ena Valenibulalevu e Suva ni a taqa sivia na nona icegu. A leqa na marama qo ni oti e 17 na siga ni nona curu ena ika10 ni Okosita, 2021. Sebera ni cula na marama qo.
E 3 tale ga ratou sa leqa ka vakadeitaki vei ratou na COVID-19. Ia, sa vakadeitaki vakavuniwai ni sega ni vuni nodratou leqa na COVID-19, ratou leqa ga ena mate bibi sa tiko rawa vei ratou.
Ena irogo vou ni lewenivanua era sa leqa, sa 327 taucoko na leqa mai na COVID-19 e Viti. E 325 na lewenivanua era leqa me tekivu ena Evereli ni yabaki qo. Ni vakatautauvatataki ena 7 na siga, e rauta ni 7 na leqa ena COVID ena dua na siga. E 171 tale ga na lewenivanua sa leqa ena mate bibi e tauvi ira rawa tiko; qo era sega ni okati mera leqa ena COVID-19.
Na Curu e Valenibula
Ena gauna qo e 300 taucoko na tauvi COVID-19 era curu tiko e valenibula. E 62 era curu tiko ena Valenibula e Lautoka. E Suva, e 67 na tauvimate era curu ena Valenibula Veivuke na FEMAT ka 171 era curu ena Valenibulalevu e Suva, St Giles kei Makoi. E 41 na tauvimate era sa tauvimate bibi, 9 sa bibi vakalevu sara vei ira na mate.
iRogo ni Vakadidike Vakavuniwai
E 6,176 taucoko na lewenivanua era vakadikevi ka 773 e tauri na nodra sabolo ena veivanua ni vakadidike vakavuniwai tudei ena loma ni 24 na aua sa oti. Sa 432,174 taucoko era sa dikevi vakavuniwai ka 76,462 sa tauri na nodra sabolo me yacova mai nikua. Ena vanua ni vakadidike veitosoyaki, sa 1,366 sa vakadidiketaki vakavuniwai me yacova mai na ika9 ni Okosita ka 155 na sabolo e tauri. Sa 783,709 taucoko na levu ni lewenivanua era sa vakadidiketaki vakavuniwai me yacova mai nikua ka 69,206 sa tauri na nodra sabolo.
iRogo ni Vakadidiketaki ni Sabolo
E 297,801 taucoko na levu ni sabolo sa vakadidiketaki rawa me tekivu mai na Evereli ni 2021 ka 340,662 na levu kece ni sabolo sa vakadikevi rawa me tekivu mai ena Maji ni 2020. Sa 1,085 taucoko na sabolo vakadidiketaki ena ika8 ni Okosita. Mai na iwiliwili sa tiko rawa, ni vakatautauvatataki ena 7 na siga e rauta ni 2,489 na sabolo e vakadidiketaki ena dua na siga se 2.8 mai na 1,000 na lewenivanua. Ni vakatautauvatataki ena 7 na siga e rauta ni 37.1 na pasede ni kisi vakadeitaki.
iRogo ni Veicula
Me yacova mai na ika9 ni Okosita, sa 513,535 na lewenivanua era sa cula ena imatai ni cula ka 180,722 ena ikarua ni cula. E kena ibalebale ni sa 87.5 na pasede ni lewenivanua e gadrevi era sa cula ena imatai ni cula ka 30.8 na pasede era sa cula ena ikarua ni cula.
Ni raica ena vatavata ni veicula ni Tabacakacaka ni Bula na iwiliwili ni lewenivanua era sa cula vakadua kei ira sa cula vakarua ena noda vanua, vaka kina na veiwasewase lelevu (divisional) kei na veiwasewase lalai (sub-divisional). Ena rawa ni o raica na vatavata qo ena
http://bit.ly/3h2JfCZ
Veika me baleta na matetaka
Ni vakatautauvatataki ena dua na siga, sa 730 na kisi vou ena dua na siga se 825 na kisi mai na 1 na milioni na lewenivanua ena dua na siga. Keitou sa raica ni sa lutu tiko na iwiliwili ni kisi ena vica na siga qo. Ia, e lutu tale tiko ga na iwiliwili ni lewenivanua e vakadikevi ena veisiga. Qo e vuna na veisau ni tuvatuva ni vakadikevi vakavuniwai e Suva-Nausori. Era sa vakadikevi tiko ga o ira na lewenivanua e Suva-Nausori era ririkotaki ni na rawa ni bibi na nodra tauvimate, mevaka sa kacivaka na Vunivola Tudei ni Tabacakacaka ni Bula ena ika21 ni Jiulai. E qaravi na ituvatuva qo me rawa ni vakatabakidua na veiqaravi ena nodra laurai totolo na tauvimate kei na nodra qaravi na ririkotaki ni rawa ni bibi na nodra tauvi COVID. Qo me rawa ni tarova na kena lai bibi na tauvimate kei na mate mai na COVID-19.
Sa laurai tiko na revurevu ni veisau ni tuvatuva ni vakadikevi vakavuniwai ena kena lutu tiko na iwiliwili ni kisi ena veisiga. E sega ni kena ibalebale qo ni sa malumalumu tiko na veidewavi ni mate ena veitikotiko e Suva-Nausori. Sa kacivaka oti na Vunivola Tudei ni Tabacakacaka ni Bula, ni na sega ni vakayagataki na iwiliwili ni kisi vakadeitaki ena veisiga me vakaraitaka na veidewavi ni mate e Suva-Nausori. Sa wanonova matua tiko na Tabacakacaka ni Bula na ivakaraitaki eso, mevaka na kisi e vakadeitaki ena veisiga, na curu e valenibula kei na mate mai na COVID. Qo me vakadeitaka na toso ni veidewavi ni mate e Suva-Nausori. Na kisi vakadeitaki ena veisiga e Suva-Nausori e tiko ena loma ni 40 – 50 na pasede, ni bera ni veisautaki na ituvatuva ni vakadikevi vakavuniwai. Ia, e sega ni lutu ni oti na kena veisautaki na ituvatuva. Sa sivita na vakatautauvatataki ni wiliwili ena noda vanua. Qo e ivakatakilakila ni tubu tiko na dewa tawakilai ni mate e Suva-Nausori.
E tubu tiko ga na iwiliwili ni tauri sabolo ena Yasayasavakara ka rauta ni 3.8 ina 4 na vakadidike mai na 1,000 na lewenivanua ena dua na siga. Sa laurai ni tubu tale tiko ga na iwiliwili ni kisi ena Yasayasavakara ka vakaraitaka tiko na dewa tawa kilai ni mate. Sa tubu tale tiko ga na iwiliwili ni lewenivanua mai na Yasayasavakara era tauvimate bibi ka vakaleqai. Ia, se sega tiko ni dua na kisi vakadeitaki ena Wasewase na Vualiku kei na Tokalau.
iVakasala raraba
Era se leqa tiko ga mai vale na lewenivanua e bibi vei ira na COVID-19 se, ra qai gole mai valenibula ni sa bibi vei ira na mate. Na tauvimate bibi ena gadrevi me na laurai vakatotolo, ke bera na nodra qaravi ena ivakatatao ni nodra na rawa ni bula mai na tauvimate.
Ni sa kerei na lewenivanua mo ni kila na ivakatakilakila ni sa bibi na tauvi COVID-19, qo e okati kina na:
• Taqanicegu
• Mosinisarisari
• Mosiniulu me vica na siga
• Veilecayaki, sega ni rawa ni yadra se me yadra vakadede
• Mamacaniyago, tebenigusu se taukuku.
Kevaka o vakila na ivakatakilakila ni sa bibi na nomu tauvi COVID-19 mevaka na taqanicegu kei na mosinisarisari,
kerekere ni gole vakatotolo ena dua na vanua e qaravi vakatabakidua kina na tauvi COVID:
- Valenibulalevu e Suva
- Valenibula veivuke na FEMAT ena Vodafone Arena
Na lewenivanua e Nausori era vakila ni sa bibi na nodra tauvi COVID, me ra gole ina:
- Valeniwai e Nausori
- Valenibula e Wainibokasi
Ena Yasayasavakara, kerekere ni gole ena dua na valeniwai voleka kevaka ni vakila ni sa bibi vei kemuni na COVID-19.
Qirita na 165 kevaka o sega ni rawa ni gole ina dua na vanua ni veiqaravi vakavuniwai.
Vinaka.