ITAUKEI - STATEMENT BY PERMANENT SECRETARY FOR HEALTH & MEDICAL SERVICES DR. JAMES FONG - 11.07.21

iRogo ni Veidewavi ni Mate
E 485 na kisi vou vakadeitaki ka 3 sa mai leqa ena loma ni 24 na aua me yacova na 8 ena mataka nikua. Na matailalai ni tukutuku ni COVID-19 e sa tiko ena vatavata ni Tabacakacaka ni Bula kei na iVolamata ni Matanitu (Fijian Government Facebook page). Ena rawa tale ga ni o raica ena vatavata ni COVID ni Tabacakacaka ni Bula na http://bit.ly/3vE2ZBb, na vanua era tiko kina na veikisi vou.

Na imatai ni leqa ena COVID-19 e dua na marama yabaki 77 e ColoiSuva, a leqa ga ena nona itikotiko. A vakaraitaka na nona vuvale ni sa siga 3 e tauvimate tiko kina. E sebera ni cula. 

Na kena ikarua e dua na turaga yabaki 75 e Nabua, a leqa tale ga ena nona itikotiko. A vakaraitaka na nona vuvale ni sa siga 3 tiko na nona tauvimate. A sa sega ni via kana ka malumalumu tiko ga. E sebera ni cula.

Kena ikatolu e dua na marama yabaki 38 mai Nakasi. A lai dikeva e dua na timi ena vanua a davo tiko kina, ka cicivaki sara ena Valenibulalevu e Suva ni laurai vua na ivakatakilakila ni bibi ni mate. Sa bibi vua na mate ena nona curu tiko mani leqa ni oti e 4 na siga. E sebera ni cula.

Sa 55 taucoko na leqa mai na COVID-19 e Viti, e 53 era sa leqa me tekivu mai na Evereli ni yabaki qo. E 21 sa mate ena mate bibi sa tauvi ira rawa tiko. E sega ni vuni nodratou mate na COVID. E 1 se vakadikevi tiko vakavuniwai na vuni nona mate.  Ni vakatautauvatataki  ena 7 na siga sa 3 na iwiliwili ni mate ena dua na siga, qo me yacova mai na ika9 ni Jiulai.

E 162 sa bula me yacova mai na irogo sa oti, kena ibalebale sa 8,576 na kisi vakadeitaki. E 10,442 taucoko na levu ni kisi me vakatekivu mai na Evereli ni 2021. Sa 10,512 na levu taucoko ni kisi ena noda vanua me vakatekivu mai na Maji ni 2020, ka 1,859 era sa bula.

iRogo ni Vakadidike Vakavuniwai
E 4,127 taucoko na lewenivanua era vakadikevi ka 913 e tauri na nodra sabolo ena veivanua ni vakadidike vakavuniwai tudei, ena loma ni 24 na aua sa oti. Qo sa 282,083 taucoko era sa dikevi vakavuniwai ka 43,558 sa tauri na nodra sabolo me yacova mai nikua. Ena veiqaravi ni timi era veitosoyaki ena veitikotiko, sa 4,113 taucoko na lewenivanua era vakadikevi ka 418 sa tauri na nodra sabolo ena loma ni 24 na aua sa oti. Me yacova mai nikua, sa 694,316 taucoko sa dikevi vakavuniwai ka 58,278 sa tauri na nodra sabolo ena vanua ni vakadidike veikauyaki.

iRogo ni Vakadidiketaki ni Sabolo
E 195,695 taucoko na levu ni sabolo sa vakadidiketaki rawa me tekivu mai na Evereli ni 2021 ka 238,520 na levu kece ni sabolo sa vakadikevi rawa me tekivu mai ena yabaki 2020. Sa 3,123 taucoko na sabolo vakadidiketaki a ripotetaki ena ika9 ni Jiulai. Na iwiliwili ni sabolo vakadikevi ena ika9 ni Jiulai mai na veivolau ni vakadidike se ciqomi tiko ka namaki me na tubu ena gauna sa na taucoko kina na iwiliwili. Na iwiliwili mai na ika8 kei na ika9 ni Jiulai mai na so tale na volau ni vakadidike se ciqomi tiko. E namaki me na tubu tale na iwiliwili ena gauna sa na vakadeitaki kina. Ni vakatautauvatataki ena 7 na siga e rauta ni 3,604 na sabolo e vakadidiketaki ena dua na siga se 4.1 mai na 1,000 na lewenivanua. Ni vakatautauvatataki ena 7 na siga e rauta ni 17.4 na pasede ni kisi vakadeitaki ka se tubu tiko ga na iwiliwili.

iRogo ni veicula
Me yacova mai nanoa sa 353,303 na lewenivanua era sa cula ena imatai ni cula ka 66,635 ena ikarua ni cula. E kena ibalebale ni sa 60.2 na pasede ni lewenivanua e gadrevi era sa cula ena imatai ni cula ka 11.4 na pasede era sa cula ena ikarua ni cula.

Ni raica ena vatavata ni veicula ni Tabacakacaka ni Bula na iwiliwili ni lewenivanua era sa cula vakadua kei ira sa cula vakarua ena noda vanua, vaka kina na veiwasewase lelevu (divisional) kei na veiwasewase lalai (sub-divisional). Ena rawa ni o raica na vatavata qo ena http://bit.ly/3h2JfCZ


Veika me baleta na matetaka
Ni vakatautauvatataki ena 7 na siga, sa 622 na kisi vou ena 1 na siga se 702 na kisi mai na 1 na milioni na lewenivanua ena 1 na siga. Na tubu ni wiliwili ni kisi ena veisiga eda vakadinadinataka ni tubu tale tiko ga na iwiliwili ni lewenivanua era tauvimate bibi mai na COVID-19, kei ira era vakaleqai.

iVakasala raraba
Sa tubu tiko na iwiliwili ni kisi ena veisiga. Sa tubu tale ga na iwiliwili ni lewenivanua era curu e valenibula kei ira na sa vakaleqai. Ni sa kerei tiko na lewenivanua moni cula ena kena gauna totolo taudua. Ni sa taucoko na nomu cula, ena vakalailaitaka na ririko ni kena takavi iko na mate. Ia, e vinaka meda cula vakarua ni na vakalailaitaka na ririko ni noda tauvimate bibi mai na COVID-19, veitalia mada ga ke sa tiko vei iko na mate. E sega ni se dua na lewenivanua e vakaleqai mai na COVID-19 ena noda vanua me sa cula vakarua. Keitou vakadeitaka mai na vakadidike mai Bolatagane ni cula na Oxford – Astrazeneca ena vakalailaitaka na ririko ni nomu curu e valenibula mai na kena mataqali na Delta, ena 92 na pasede. Na veivanua kece ni veicula sa kaburaki tiko yani ena veisiga ena vatavata ni monalivaliva ni Tabacakacaka kei na niusiveva. 

Vinaka